Япония терма жамоаси ва «Зальцбург» футбол клуби ҳужумчиси Такуми Минамино фаолиятини «Ливерпуль»да давом эттиради. Бу ҳақида клуб расмий сайтида маълум қилинди.
Трансфер ва келишувнинг тафсилотлари очиқланмаган. Япониялик ҳужумчи 2020 йилнинг 1 январидан «қизиллар» футболчисига айланади. Аввалроқ «Ливерпуль» Минаминони 7,25 миллион фунтга сотиб олиши мумкинлиги хабар қилинганди.
24 ёшли футболчи «Зальцбург» сафида 199 ўйин ўтказиб, 64 та гол уришга эришди. Шунингдек у Япония терма жамоасидаги 22 ўйинда 11 та гол уришга муваффақ бўлган.
Австрия Бундеслигасининг ушбу мавсумида Минамино 14 учрашувда бештадан гол ва самарали узатмага муаллиф бўлди. Чемпионлар Лигасида эса 6 ўйинда иккита гол урди ва учта самарали узатма амалга оширди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)