Япониянинг йирик шаҳарларидаги LED-экранларда Ўзбекистоннинг туристик салоҳияти намойиш этилмоқда (видео)

Япониянинг Нагоя ва Токио шаҳарларидаги сайёҳлар ва маҳаллий аҳоли энг гавжум кўчаларининг марказларида жойлашган йирик LED-экранларда «Ўзбектуризм» томонидан Ўзбекистоннинг туристик салоҳиятига бағишлаб тайёрланган ролик намойиш этила бошланди.

Нагояда маҳаллий вақт билан эрталаб соат 06:00 дан тунгги 00:00 гача, ҳар соатда 16 марта вокзал бекатидан чиқишда айлантириб турилади.

Токионинг энг гавжум майдонларидан бири Сибуяда эса 4 та йирик экранда 18—20 декабрь кунлари маҳаллий вақт билан соат 09:00 дан 00:00 гача ҳар соатда қўйилади.

«Ўзбектуризм» матбуот хизматида таъкидланишича, ушбу видероликлар намойишидаги яна бир эътиборли жиҳат намойишнинг айнан Президент Шавкат Мирзиёевнинг Японияга амалга ошираётган олий даражадаги ташрифи доирасига тўғри келганидир.

Эслатиб ўтамиз, Ўзбекистон Президенти Шавкат Мирзиёев Япония бош вазири Синдзо Абэнинг таклифига биноан жорий йилнинг 17—20 декабрь кунлари расмий ташриф билан ушбу мамлакатда бўлади. Президентининг Японияга ташрифи доирасида қиймати 6,5 миллиард долларга тенг бўлган 48 та келишув ва шартнома имзоланиши кутилмоқда.