Интернет фойдаланувчилари томонидан порнографик фото ва видео маҳсулотларни тарғиб қилувчи интернет ресурсларидан фойдаланиш жараёнида улардан пул талаб қилаётган хакерлар пайдо бўлди. Бу ҳақда Ўзбекистон Ички ишлар вазирлиги хабар берди.
Маълум қилинишича, фуқаролар томонидан порнографик фото ва видео маҳсулотларни тарғиб қилувчи интернет ресурсларидан фойдаланиш жараёнида бошқа шу каби ресурсларга автоматик тарзда ўтиб кетиш оқибатида «Ўзбекистон Республикаси ИИВ Кибержиноятларга қарши кураш бўлимидан билдиришнома» сарлавҳаси остида сизиб чиқувчи ойна пайдо бўлмоқда.
ИИВнинг хабар беришича, пайдо бўладиган ойнада фойдаланувчининг тақиқланган сайтларга киргани сабабли гўёки ИИВ томонидан у 200 минг сўм, айрим ҳолларда эса 300 минг сўм миқдорида жаримага тортилгани ҳақида хабар чиқади. Хабарда фойдаланувчи Webmoney электрон тўлов тизими орқали давлат ҳисобига тўловни амалга ошириши кераклиги айтилади.
Шунингдек, юқорида қайд этилган жарима тўланмаган тақдирда қурилмада сақланган контактларга фойдаланувчининг порнографик фото ва видео маҳсулотлар жойлаштирилган интернет ресурсларидан фойдалангани ҳақида ҳодиса баёни ҳамда фойдаланувчига жаримани тўлаши талаби билан SMS хабар юборилиши айтилмоқда. Шу билан бирга, фойдаланувчиларнинг интернет браузери блокировка ҳолатига тушиб қолмоқда.
Ушбу ҳолат юзасидан Ички ишлар вазирлигининг таъкидлашича, Ўзбекистон Республикаси Ички ишлар вазирлиги таркибида Кибержиноятларга қарши кураш бўлими номи билан фаолият юритувчи бўлим ёки бўлинма мавжуд эмас. Шунингдек, Webmoney тўлов тизимида Ўзбекистон ИИВ таркибий ва ҳудудий тузилмалари электрон ҳамёнларга эга эмас.
ИИВ фуқароларни интернет тармоғидан фойдаланаётганда бу каби салбий ҳолатларга дуч келмаслик учун фирибгарларнинг алдовига ишониб қолмасликка чақирган ҳамда бугунги кунда мазкур ҳолатлар юзасидан суриштирув ишлари олиб борилаётганлигини маълум қилган.
Изоҳ (0)