«Барселона» — «Реал» учрашувини бошқариб борадиган ҳакам маълум бўлди. У Рамосни икки бор четлатган

Испания футбол федерацияси «Барселона» ва «Реал» ўртасидаги учрашувга ҳакамлар тайинлади.

Ла Лига 13-туридан доирасидаги қолдирилган учрашувни Алехандро Эрнандес Эрнандес бошчилигидаги ҳакамлар гуруҳи бошқариб боради. Бу испаниялик ҳакам фаолиятидаги тўртинчи «Эл-Класико» ҳисобланади.

Эрнандес Эрнандес мазкур жамоалар ўртасидаги учрашувларда икки бор мадридликлар ҳимоячиси Серхио Рамосга қизил карточка кўрсатган: 2015/16 йилги мавсумда «Камп Ноу» ва 2016/17 йилги мавсум «Сантьяго Бернабеу»даги ўйинда. Шунингдек, 2015/16 йилги мавсумда ҳакам Гарет Бэйлнинг «Барселона»га урган голини бекор қилган.

Алехандрога қанотларда Теодоро Собрино Маган ва Хосе Энрике Перес Наранхо ёрдам беради. Видеотакрорлар тизимига эса Рикардо де Бургос ва Хон Нуньес Фернандеслар жавоб беради.

«Барселона» ва «Реал» ўртасидаги учрашув 18 декабрь куни «Камп Ноу»да бўлиб ўтади. Мазкур ўйин Каталониядаги тартибсизлар сабаб қолдирилганди.