Ўзбекистонда хизмат кўрсатган журналист, шоир Абдували Қутбиддин 8 декабрь куни 59 ёшида Тошкент шаҳрида вафот этди. «Kun.uz»нинг ёзишича, Абдували Қутбиддин бетоблиги сабаб, икки ҳафтадан ортиқ вақт давомида шифохонада бўлган.
Жаноза 8 декабрь куни марҳумнинг ота юрти — Самарқанд вилоятининг Ургут тумани «Мерганча» маҳалласида соат 14:00 да ўқилади ва Ургутнинг «Сўфиён» маҳалласидаги Чор чинор зиёратгоҳи қабристонида, бобоси, таниқли олим шайх Қутбиддин Муҳиддинов ёнида дафн этилади.
Абдували Қутбиддинов 1983 йил Тошкент давлат университети (ҳозирги ЎзМУ)нинг журналистика факультетини тамомлаган. Меҳнат фаолиятини Самарқанднинг «Зарафшон» газетасида бошлаган.
Кейинчалик Ғафур Ғулом номидаги Адабиёт ва санъат нашриётида, «Ёзувчи» нашриётида, Ўзбекистон Миллий телерадиокомпаниясида, «Халқ сўзи» газетасида турли лавозимларда хизмат қилган.
Шоирнинг «Найсон», «Ҳумо», «Бахтли йўл», «Бор» (сайланма, 2011) каби шеърий тўпламлари, «Озодлик» номли достони чоп этилган. «Дўстлик» ордени билан мукофотланган.
Изоҳ (0)