Ўзбекистоннинг Вашингтон шаҳридаги элчихонаси маълумотларига кўра, 27 ноябрь куни Канаданинг Онтарио провинциясида асли ўзбекистонликларни ташиётган самолёт ҳалокати содир бўлган жой тегишли тузилмалар томонидан тўлиқ ўрганиб чиқилган, самолётнинг барча парчалари пухта таҳлил қилиш учун Торонто шаҳридаги махсус текширув марказига етказилган.
ТИВ матбуот хизматининг хабар беришича, айни пайтда Канада маъмурлари билан биргаликда ҳалок бўлганларнинг жасадларини аниқлаштириш ва уларни қариндошларига топшириш бўйича ишлар олиб борилмоқда.
Элчихона Канада ТИВ ва ҳуқуқни ҳимоя қилиш идоралари вакиллари, авиаҳалокатда вафот этганларнинг қариндошлари ва яқинлари, Торонто шаҳри ва АҚШнинг Техас штатидаги ўзбек диаспораси билан яқин алоқада бўлиб турибди.
Шунингдек, 2 декабрь куни Ўзбекистон элчиси Жавлон Ваҳобов Торонто шаҳрида Канада транспорт хавфсизлиги кенгаши вакиллари ва маҳаллий тергов идоралари билан учрашувлар ўтказади.
Эслатиб ўтамиз, ҳодиса 27 ноябрь куни Канаданинг Онтарио провинциясида юз берган. Самолётда икки оила — Облоқуловлар ва Набиевлар оиласи бўлган (самолёт эса Облоқуловлар оиласи бошлиғига тегишли бўлган). Ҳалок бўлганларнинг уч нафари болалар — бари Облоқуловнинг фарзандлари. Маълумотларга кўра, авиаҳалокат юз берган вақтда кучли шамол кузатилаётган бўлган. Ўзбекистон Ташқи ишлар вазирлигидан маълум қилишларича, улар дам олиш кунларини Кингстон шаҳрида ўтказиш учун учиб кетаётган бўлган.
Изоҳ (0)