Қашқадарёнинг Чироқчи тумани Бешчашма қишлоғида ов милтиғи билан «Ўзбекистон Қизил китоби»га киритилган яна битта қўнғир айиқ отиб ўлдирилгани, овчилар жазосиз қолаётгани хабар берилган эди. Ижтимоий тармоқларда ҳам воқеа акс этган видео тарқалиб, кескин муҳокамаларга сабаб бўлган.
Экология ва атроф-муҳитни муҳофаза қилиш давлат қўмитаси матбуот қўмитасининг хабар беришича, ушбу хабар юзасидан қўмитанинг Қашқадарё вилояти бошқармаси томонидан текширув ўтказилган.
Қайд этилишича, видеолавҳада исми шарифи тилга олинган «Нуробод» маҳалла фуқаролар йиғинида истиқомат қилувчи фуқаро Ботиров Сайдулло билан суҳбат ўтказилганда ҳолат 2016 йил май ойида содир бўлгани аниқланган.
Унинг сўзларига кўра, фермер хўжалигида ишчилар чорва молларига хашак йиғаётган вақтда номаълум айиқ келиб қолган ҳамда укаси Тоғаев Сирожга ҳамла қилиб, қорин қисмидан тишлаб 40—50 метрлар чамасида судраб кетаётганида Тоғаев Сардор ва Тоғаев Ислом шоха ҳамда кетмон билан уриб ўлдирган, сўнг жароҳатланган Тоғаев Сирож касалхонага олиб кетилган.
Мавзуга доир: Қашқадарёда бир гуруҳ шахслар Халқаро қизил китобга киритилган қўнғир айиқни ўласи қилиб дўппослади
«Юқорида баён этилган ҳолат юзасидан тўпланган маълумотлар Қашқадарё вилояти прокуратурасига тақдим этилган. Қўнғир айиқ ноқонуний тартибда ўлдирилган бўлса, айбдор шахсларга нисбатан қонунчиликда белгиланган тартибда чора кўрилади ва етказилган зарар ундириб олинади», — дейилади қўмита хабарида.
Маълумот учун, «Ўзбекистон Қизил китоби»га киритилган қўнғир айиқни овлаш тақиқланган ва у муҳофаза остига олинган.
Мавзуга доир: Наманганда «Қизил китоб»га киритилган қўнғир айиқ отиб ўлдирилгани тафсилотлари маълум қилинди (видео)
Эслатиб ўтамиз, бундан аввал ҳам Қашқадарёнинг Чироқчи туманида бир гуруҳ шахслар «Халқаро Қизил китоб»га киритилган қўнғир айиқни ўласи қилиб дўппослаган, Наманган вилояти Чуст туманида ҳам «Қизил китоб»га киритилган қўнғир айиқ отиб ўлдирилган эди.
Изоҳ (0)