Тошкент шаҳар Ёнғин хавфсизлиги бошқармаси фуқаролар ҳамда ташкилот, корхона ва муассасаларнинг раҳбарларига иситиш мосламаларидан фойдаланишда хавфсизлик чораларига риоя этишга чақирди.
«Об-ҳавонинг кескин совиб кетиши натижасида газ ҳамда электр иситиш мосламаларидан фойдаланишга бўлган эҳтиёж ортиб боради. Бундай пайтларда айрим фуқароларнинг эҳтиётсизлиги оқибатида кўнгилсиз ҳодисалар содир бўлиши мумкин», — дейилади хабарда.
Мазкур ҳодисаларни олдини олиш мақсадида газ ва электр ускуналаридан ҳамда иситиш мосламаларидан фойдаланишда қуйидаги ёнғин хавфсизлиги талабларига риоя қилиш зарур:
- Қўлбола ва носоз газ ҳамда электр иситиш мосламаларидан фойдаланманг;
- Тунги вақт аҳоли турар жойларида ўрнатилган иситиш тизимини назоратдан қолдирманг;
- Ошхонада ўрнатилган табиий газда ишловчи плиталардан хоналарни иситиш мақсадида фойдаланманг;
- Иситиш печлари ва уларнинг мўриларини созлигига, турли буюм ва тўсиқлар билан беркитилмаслигига ҳамда махсус ташкилотлар томонидан ўз вақтида тозаланишига алоҳида эътибор беринг;
- Иситиш мосламаларидан фойдаланишда уларни ишлаб чиқарган корхонанинг тавсия ва йўриқномаси талабларига риоя қилинг;
- Иситиш мосламалари яқинида ёнувчан буюм ва осон алангаланувчи маҳсулотларни сақламанг;
- Газ ускуналарни улаш тартиб қоидаларига риоя қилинг ва уларга резина шлангалар орқали уланишга йўл қўйманг;
- Агарда газ ҳидини сезсангиз, чироқ ва учқун чиқарувчи мосламалардан асло фойдаланманг, дарҳол хонани шамоллатинг ҳамда газ хизматига хабар беринг.
Изоҳ (0)