Қашқадарё вилояти халқ таълими бошқармаси Нишон туманидаги 2-умумий ўрта таълим мактаби фаолиятига доир «Нишонда бир мактаб иккига бўлинган. Айрим синфларга ‘омборхона’да дарс ўтилади» мақоласи юзасидан суриштирув ишларини олиб борди.
Ишчи гуруҳ аъзолари томонидан вазият ўрганилган ва тегишли чора-тадбирлар ишлаб чиқилган.
«Мактабда ўқув синфларида 2 навбатда тўлиқ ўқитилиб келинаётганлиги сабабли айрим синфлар мактабнинг эски биносида таълим олишларига тўғри келади. Мактабга қўшимча бино қуриб бериш учун 2020 йил туман ‘Обод қишлоқ’ дастурига 210 ўринли қўшимча бино қуриш учун таклифлар берилган.
Туман халқ таълими бўлимига қарашли 38 та умумий ўрта таълим мактаблари учун 308 930 000 сўмлик ўқувчилар парта стуллари кузги таътил даврида 2-умумий ўрта таълим мактабининг эски биносига вақтинча олиб келиниб, бир кун муддатда барча мактабларга етказиб берилди. Тасвирда кўрсатилган ўқувчилар парта стуллари йиғиб қўйилган хона омборхона эмас, синфхона сифатида фойдаланиб келинмоқда.
Шунингдек, мактабнинг ташқи кўриниши туман халқ таълими бўлими ҳузуридаги қурилиш эксплуатация бўлими томонидан таъмирланиб, амалий ёрдам кўрсатилди», — дейилади хабарда.
Нишон туманидаги 2-умумий ўрта таълим мактабининг 2 та ўқув биноси мавжуд бўлиб, биринчи биноси 1958 йилда қурилган, қуввати 210 ўринли ва спорт зали мавжуд. Иккинчи бино эса 2007 йилда инвестиция дастури асосида қурилган бўлиб, қуввати 315 ўринга мўлжалланган. Жорий ўқув йилида 705 нафар ўқувчилар таълим-тарбия олиб келмоқда.
Изоҳ (0)