Андижонда газ ва ҳаво аралашмасидан юз берган чақнаш оқибатида уч киши жароҳатланди. Бу ҳақда «Ҳудудгазтаъминот» АЖ матбуот хизмати хабар берди.
20 ноябрь куни кеч соат 2:30 лар атрофида Андижон вилоятининг Булоқбоши тумани «Шоҳгузар» МФЙ ҳудудида яшовчи 1972 йилда туғилган фуқаро Хасанбой Эсонов хонадонида газ ва ҳаво аралашмасидан чақнаш билан боғлиқ фалокат содир бўлди. Мазкур чақнаш натижасида Хасанбой Эсоновнинг турмуш ўртоғи С.Эсонова 5 фоиз, 2001 йилда туғилган ўғли О.Мусурмонқулов эса 45 фоиз тана қисмининг куйиши оқибатида касалхонага ётқизилган.
Ушбу кўнгилсиз ҳолатнинг сабаблари «Ҳудудгаз Андижон» МЧЖ ва тегишли идоралар томонидан ўрганилганда фуқаро Х.Эсонов хонадонига қўлбола (юмалоқ шаклдаги) иситиш мосламаси ўрнатиб, унга 1,5 метр оддий резина шланг улаб фойдаланиши ҳамда резина шлангнинг емирилиши оқибатида сизиб чиққан газ ҳидини сезмасдан электр чироқни ёқиб юбориши оқибатида келиб чиққанлиги аниқланди.
Ҳозирда ҳодиса юзасидан туман прокуратураси ва ИИБ томонидан суриштирув ишлари олиб борилмоқда.
Маълумот учун, 18 ноябрь куни худди шундай фалокат Фарғона вилоятида ҳам юз берган эди.
«‘Ҳудудгазтаъминот’ АЖ ва унинг республикадаги филиаллари томонидан аҳоли ўртасида газдан ва айниқса, ис газидан заҳарланиш каби бахтсиз ҳодисаларни олдини олишга қаратилган огоҳлантиришларга қарамай, афсуски, фуқаролар томонидан ускуналарни ишлатиш йўриқномаси талаблари ва техника хавфсизлиги қоидаларига амал қилинмаслиги ҳамда ўзбошимчалик билан иш тутаётганликлари оқибатида кўнгилсиз ҳодисалар келиб чиқмоқда.
‘Ҳудудгазтаъминот’ АЖ яна бир бор газ истеъмолчиларидан огоҳ бўлишларини, хонадонларидаги мавжуд барча газ ускуналаридан йўриқнома талаблари ва техника хавфсизлиги қоидаларига амал қилган ҳолда фойдаланишларини сўрайди.
Техник носозлик кузатилганда дарҳол газ таъминоти корхоналарига 104, 1104, 71 200-08-04 рақамлари орқали мурожаат қилишни унутманг!», — дейилади хабарда.
Изоҳ (0)