Тошкентда Марказий Осиё мамлакатлари ташқи ишлар вазирлари учрашуви бўлиб ўтди

Тошкентда Марказий Осиё мамлакатлари ташқи ишлар вазирларининг учрашуви бўлиб ўтди, деб хабар бермоқда ТИВ матбуот хизмати.

Учрашувда Ўзбекистон, Қозоғистон, Қирғизистон, Тожикистон ва Туркманистон ТИВ раҳбарлари Абдулазиз Комилов, Мухтар Тлеуберди, Чингиз Айдарберков, Сирожиддин Муҳриддин ва Рашид Мередов минтақавий ҳамкорликни ривожлантириш масалаларини ва олий даражадаги учрашувга тайёргарлик жараёнини муҳокама қилган.

Йиғилишда таъкидланишича, ҳозирги пайтда давлат раҳбарларининг сиёсий иродаси сабаб Марказий Осиёда бутунлай янги дўстлик, ҳамкорлик ва ўзаро ишонч муҳити шаклланган.

Вазирлар савдо айланмасининг юқори суръатларда ўсганини, транспорт-коммуникация тизимларини ривожлантириш бўйича ишларнинг фаоллашганини, минтақа мамлакатларини боғлайдиган янги ер усти ва ҳаво йўналишлари очилганини қайд этган.

Шунингдек, 29 ноябрь куни Тошкент шаҳрида бўлиб ўтадиган Марказий Осиё давлатлари раҳбарларининг маслаҳат учрашувининг кун тартиби кўриб чиқилган. Кун тартибига савдо-иқтисодий ва инвестицион ҳамкорлик, транспорт инфратузилмаси, илмий-техник ва маданий-гуманитар алоқаларни ривожлантириш масалалари киритилиши режалаштирилмоқда.

Вазирлар саммитнинг якуний ҳужжати лойиҳаси ва бошқа режалаштирилаётган қарорларни ҳам муҳокама қилган.

Аввалроқ Тошкентда Марказий Осиё минтақавий иқтисодий ҳамкорлик дастурининг 18-конференцияси бўлиб ўтгани хабар берилган эди.