Кореяга ишга жўнатишни ваъда қилиб, 181 кишидан 6,5 млрд сўмни ўзлаштирган бандлик агентлиги раҳбари қидирувга берилди

Жанубий Кореяга 6 ой муддатда ишга юборишини айтиб, миллиардлаб сўм маблағни ўзлаштирган хусусий бандлик агентлиги раҳбари қидирувга берилди. Бу ҳақда ИИВ ҳузуридаги Тергов департаменти «Дарё»га маълум қилди.

Аввлароқ Profelite IMP хусусий бандлик агентлиги Кореяда ишлаш ниятидаги юзлаб ўзбекистонликларни алдагани ҳақида хабар берилган эди. Хабарда алданган фуқароларнинг айримлари ўзини ўлдириш ва оиласидан ажрашиш даражасига етгани, агентлик раҳбарига нисбатан жиноий иш очилгани таъкидланган эди.

Тергов департаменти тақдим этган ахборотга кўра, Profelite IMP хусусий бандлик агентлиги раҳбари Иброҳимжон Жонузоқовга нисбатан Жиноят кодексининг 168-моддаси 2-қисми «а» (анча миқдорда фирибгарлик) билан қўзғатилган жиноят иши бўйича дастлабки тергов ҳаракатлари олиб борилмоқда.

Аниқланишича, Иброҳим Жонузоқов 2017 йил январь ойидан 2019 йил август ойига қадар бўлган вақт оралиғида Global Works Resources ва Profelite IMP хусусий бандлик агентликларини ташкил қилган. Ушбу бандлик агентликлари тегишли лицензияни олмай туриб, 181 кишини олти ойда Жанубий Кореяга ишга юборишни ваъда қилиб, улардан жами 6,5 миллиард сўм пул олган. Лекин берган ваъдасини бажармай, пулни ўз эҳтиёжларига сарфлаб юборган.

Иброҳим Жонузоқовга нисбатан Жиноят кодексининг 168-моддаси 3–қисми «б» (такроран ёки хавфли рецидивист томонидан содир этилган фирибгарлик) билан сиртдан айблов эълон қилинган ва сиртдан «қамоққа олиш» тарзидаги эҳтиёт чораси қўлланилиб, қидирувга берилган.

Иш бўйича Profelite IMP хусусий бандлик агентлиги молия хўжалик фаолияти юзасидан ҳужжатли тафтиш тайинланган. Жонузоқовнинг кўчар ва кўчмас мулк объектларига ҳамда Profelite IMP’нинг Бандлик ва меҳнат муносабатлари вазирлиги фондида мавжуд пул маблағларига банд солинган.

Жиноят иши бўйича Иброҳим Жонузоқовнинг яқин қариндошлари томонидан моддий зарарни қисман қоплаш чоралари кўрилган. Бугунги кунда Жонузоқов томонидан етказилган моддий зарарни тергов йўли билан тўлиқ қоплаш чоралари таъминланмоқда.

«Агар сиз фотосуратда кўрсатиб ўтилган шахснинг қаерда эканлиги ҳақида бирор маълумотга эга бўлсангиз, шунингдек, ушбу шахснинг ҳаракатларидан жабр кўрган бўлсангиз, ИИВ ҳузуридаги Тергов департаментининг (71) 231-32-17, (71) 231-35-202, (71) 233-65-34 телефон рақамлари ёки 102 махсус рақамига хабар беришингиз сўралади», — дейилади ИИВ ҳузуридаги Тергов департаменти эълонида.