15 ноябрь, жума куни Тошкентнинг Олмазор туманида жойлашган Республика велотрек ўқув-машқ марказида велотрек бўйича эркаклар ҳамда аёллар ўртасида Ўзбекистон чемпионатига старт берилди.
Мазкур мусобақа халқаро талаблар даражасида қайта реконструкция қилинган ўқув-машғулот базасида ўтказилмоқда. Ушбу марказ 1982 йилда қурилган бўлиб, Президент Шавкат Мирзиёевнинг жорий йил 4 сентябрь куни бўлиб ўтган видеоселектор йиғилишида Токио—2020 Олимпия ва Паралимпия ўйинларига Ўзбекистон спортчиларини муносиб тайёрлаш ҳамда республикамизда ҳар битта спорт йўналиши бўйича спорт базаларини ташкил этиш юзасидан берилган топшириқлари ижросини таъминлаш доирасида қайта реконструкция қилинди.
Бугун ушбу марказнинг тантанали очилиш маросими ўтказилди. Унда Ўзбекистон Республикаси Олий Мажлиси Сенати раиси, Ўзбекистон велосипед спорти федерацияси президенти Танзила Норбоева, Жисмоний тарбия ва спорт вазири Дилмурод Набиев, Миллий олимпия қўмитаси президенти Рустам Шоабдураҳмонов, Европа хавфсизлик ва ҳамкорлик ташкилотининг Ўзбекистондаги координатори жаноб Жон Макгрегор, Буюк Британиянинг Вестминстер университети вице-канцлери ҳамда президенти, велоспорт бўйича Жаҳон Чемпионати ғолиби Питер Бонфилд, кенг спорт жамоатчилиги ва оммавий ахборот воситалари ходимлари иштирок этди.
Фахрий меҳмонлар рамзий тасмани қирқиб, халқаро талаблар даражасида қайта реконструкция қилинган Республика велотрек ўқув-машқ марказини очиб берди.
Бундай мажмуа пойтахтдан ташқари Наманган вилоятида ҳам барпо этилган. Яқин орада Самарқанд вилоятида ҳам замонавий велотрек ўқув-машғулотлар марказини қуриш ишлари бошланади. Умуман, биз келгусида барча вилоятларимизда мана шундай мажмуаларни барпо этиш ҳамда юртимиздан кўплаб Осиё ва жаҳон чемпионати ғолиблари, Олимпия ўйинлари чемпионларини етиштириб чиқармоқчимиз. Бизда истеъдодлар етарли, фақат уларга аввало шароит ва имкониятларни яратиб беришимиз лозим.Тадбир доирасида велоспорт бўйича Токио—2020 Олимпиадасига лицензия қўлга киритган Мурод Холмуродовга Ўзбекистон Республикаси Президенти томонидан 100 миллион сўм, унинг мураббийи Рустам Нуритдиновга 50 миллион сўм миқдорида пул мукофотлари топширилди. Шунингдек, тадбир доирасида велотрек бўйича Ўзбекистон чемпионати ғолиб ва совриндорлари ҳам тақдирланди.Танзила Нарбаева, Ўзбекистон велосипед спорти федерацияси президенти
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)