«Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун Президент томонидан имзоланди. Бу ҳақда «Ҳуқуқий ахборот» канали хабар берди.
Қонунга мувофиқ, баъзи давлат органларининг фаолияти такомиллаштирилиши муносабати билан 20 га яқин қонун ҳужжатларига ўзгартириш ва қўшимчалар киритилди.
Жумладан, «Прокуратура тўғрисида»ги қонунга киритилган ўзгартиришга кўра, прокуратура органлари ходимлари ишининг ўзига хос томонларидан келиб чиққан ҳолда 20 йилдан ортиқ иш стажига эга бўлган ходимларга 15 календарь кун қўшимча таътил берилади.
Шу билан бирга, эндиликда прокуратура органлари ходимларига илмий, педагогик ва ижодий фаолият билан шуғулланишга рухсат этилади (илгари улар илмий, ўқитувчилик ва ижодий фаолият билан фақат асосий ишдан бўш вақтда шуғулланиши мумкин бўлган).
Бундан ташқари, Солиқ кодексига тадбиркорлик субъектларининг ҳуқуқларини ҳимоя қилиш бўйича вакил тадбиркорлар манфаатларини кўзлаб маъмурий судга берилган ариза (шикоят) юзасидан давлат божини тўлашдан озод қилинишига оид норма киритилди.
Эслатиб ўтамиз, Шавкат Мирзиёев Ўзбекистон Президенти лавозимига киришганидан кейин имзолаган биринчи қонуни «Ўзбекистон Республикаси прокуратура органлари ходимлари кунини белгилаш тўғрисида»ги қонун эди.
Изоҳ (0)