«Суд ҳужжати асосида берилган ижро ҳужжатини ёки ижро ҳужжати бўлган суд ҳужжатини узрсиз сабабларга кўра ижро этмаган қарздор жисмоний шахснинг Ўзбекистондан чиқишини вақтинча чеклашни таъминлаш юзасидан Мажбурий ижро бюроси, Ички ишлар вазирлиги ва Давлат хавфсизлик хизмати Чегара қўшинларининг ҳамкорлиги тартиби тўғрисидаги низомни тасдиқлаш ҳақида»ги қарор Адлия вазирлигида давлат рўйхатидан ўтказилди. Бу ҳақда «Ҳуқуқий ахборот» канали хабар берди.
Унга кўра, қарздор жисмоний шахснинг Ўзбекистондан чиқишини вақтинча чеклаш ижро ҳужжати қарздор томонидан узрсиз сабабларга кўра ижро этилмаганда қўлланилади.
Қуйидаги ҳолларда қарздорнинг четга чиқиши чекланмайди:
- қарз миқдори энг кам иш ҳақи миқдорининг 5 бараваридан (1 миллион 115 минг сўмдан) ошмаса (аввал бу миқдор 446 мингни ташкил этган), алимент ёки бошқа даврий тўловларни ундиришни назарда тутувчи ижро ҳужжатлари бундан мустасно;
- суд қарорини ижро этиш учун етарли мол-мулк олиб қўйилган бўлса;
- қарздор юридик шахс бўлганда.
Чеклов қўйилганлиги ва олиб ташланганлиги ҳақидаги маълумот идоралараро ҳамкорлик тизими орқали ички ишлар органлари ва чегара қўшинларига юборилади.
Қарздорнинг четга чиқиши вақтинча чекланганлиги ёки олиб ташланганлиги ҳақида унга ёзма (электрон почта) ва телефон (мобил алоқа) орқали СМС юборилади.
Қуйидаги ҳолларда чеклов тўхтатиб турилади ва қаздорнинг четга чиқишига рухсат берилади:
- Ўзбекистондан ташқарида касалхонага ётқизишни талаб қиладиган ҳолларда;
- Ўзбекистондан чиқиб кетувчи делегация таркибига киритилганда.
Изоҳ (0)