Абдулазиз Комилов Брюсселда Европа Иттифоқи вице-президенти билан инсон ҳуқуқларига оид масалаларни муҳокама қилди

12 ноябрь куни Бельгияда бўлиб турган Ўзбекистон ташқи ишлар вазири Абдулазиз Комилов Европа Иттифоқининг Ташқи ишлар ва хавфсизлик сиёсати бўйича Олий вакили, Европа Иттифоқи комиссияси вице-президенти Федерика Могерини билан музокаралар ўтказди. Бу ҳақда ТИВ матбуот хизмати хабар берди.

«Томонлар жорий йилда ҳамкорлик фаоллашганини мамнуният билан қайд этди. Хусусан, бир қатор икки томонлама тадбирлар бўлиб ўтди, жумладан, адлия, ички ишлар, инсон ҳуқуқлари ва унга оид масалалар, ривожланиш масалалари бўйича Ўзбекистон—Европа Иттифоқи кичик қўмиталари ва Ўзбекистон—Европа Иттифоқи ҳамкорлик кенгашининг мажлислари ўтказилди. Европа Иттифоқи кенгашининг сиёсат ва хавфсизлик масалалари бўйича қўмитаси аъзоларининг Тошкент шаҳрига ташрифи, шунингдек, Брюссел шаҳрида Ўзбекистон—Европа Иттифоқи парламент ҳамкорлиги қўмитасининг навбатдаги мажлисини ўтказиш кутилмоқда», — дейилади хабарда.

Музокаралар давомида Кенгайтирилган шериклик ва ҳамкорлик тўғрисидаги битим (КШҲБ) матнини тезроқ тасдиқлаш зарурлиги қайд этилди.

Таъкидланишича, икки томонлама савдо-иқтисодий ва инвестицион муносабатларни янада кенгайтиришга алоҳида аҳамият қаратилади, бу эса мамлакат ҳаётининг барча соҳаларини либераллаштириш бўйича Ўзбекистонда олиб борилаётган ислоҳотларга ҳам кўмаклашади.

Учрашувда хавфсизлик соҳасидаги ҳамкорлик масалалари ҳам кўриб чиқилган ва келгуси йили сиёсат ва хавфсизлик масалалари бўйича юқори даражадаги «Европа Иттифоқи — Марказий Осиё» мулоқоти мажлисини ўтказишга тайёрлик изҳор этилган.

Ўзбекистон делегацияси раҳбари Орол денгизи фожиасининг салбий оқибатларини бартараф этиш бўйича мамлакатда қатъий чоралар кўрилаётганини таъкидлаган ва Оролбўйи минтақаси учун Инсон хавфсизлиги бўйича кўп шериклик траст фонди ва Ўзбекистондаги бошқа экологик лойиҳаларни Европа Иттифоқи қўллаб-қувватлаётганидан мамнунлигини билдирган.

Эслатиб ўтамиз, Тошкент жорий йил сентябрда Ўзбекистон ва Европа Иттифоқи ўртасида Шерикчилик ва ҳамкорликни кенгайтириш тўғрисидаги битим (ШҲКБ) лойиҳаси бўйича музокараларнинг 3-раундига мезбонлик қилаган эди.