Зафар Ҳошимов Ўзбекистонда очилиши режалаштирилган Carrefour супермаркетлар тармоғи ҳақида фикр билдирди

«Korzinka.uz» тармоғи асосчиси Зафар Ҳошимов Тошкентда ўз гипер ва супермаркетини очмоқчилигини маълум қилган Carrefour француз бренди ҳақидаги фикрлари билан бўлишди.

«Биз уларни кутаётган эдик. Carrefour тармоғининг Ўзбекистонга келиши биз учун жуда кўп яхши янгиликлар ва қизиқарли лаҳзаларни тақдим этади.

Биринчидан, халқаро даражадаги бу каби қатнашчиларнинг мамлакатимиз чакана савдо тармоғига қизиқиш билдириши бу мамлакатимизда ушбу соҳанинг ривожланаётганидан далолат беради. Истеъмол бозорига бундай қизиқиш ва тан олиш маълум бир ижобий тарзда бу соҳада лидер бўлган «Korzinka.uz» тармоғи капитализациясига таъсир қилади.

Бозор учун бу истеъмолчиларга товарларни сотиш ва реклама қилиш, танлов ва хилма-хилликнинг кўпайиши учун янги форматлар ва каналларнинг пайдо бўлишини англатади. Буларнинг барчаси замонавий савдо базасини ва мижозлар базасини кенгайтиради. Буларнинг барчаси бозорнинг барча иштирокчиларига фойда келтиради,» — деб ёзади Ҳошимов.

Тадбиркор шунингдек ўзининг рақобатдан қўрқмаслигини ҳам маълум қилди:

«30 миллиондан ортиқ истеъмолчиси бор бозор учун замонавий онлайн чакана савдо сектори ҳали ҳам ривожланмаган. Фақатгина пойтахтнинг ўзида ялпи истеъмол маҳсулотларининг 9 фоиздан камроғи чакана савдо дўконлари ҳиссасига тўғри келади. Умуман олганда, мамлакатда бу кўрсаткич янада паст. Таққослаш учун қўшни Қозоғистонда бу кўрсаткич 45 фоиздан ошади, Россияда эса бу кўрсаткич 75 фоиздан ошди. Европа ва АҚШда бу кўрсаткич 90 фоизга яқин.

Бизнинг бозоримизда ўсиши учун шароит бор ва бозорнинг тўйинишига ҳали анча бор. Ҳозирда битта асосий рақобатчимиз бор — бозор ва уюшмаган савдо дўконлари. Биз янги рақобатчиларни самимий кутиб оламиз, айниқса у келтирадиган воситалар ва билимларнинг барчаси биз учун ҳам фойдали бўлади».

Маълумот учун, Carrefour савдо дўконлари Ўзбекистонда Akfa Group билан ҳамкорликда очилиш режалаштирилган.

Биринчи босқичда еттита, шу жумладан, 2020 йилда учта супермаркет ва битта гипермаркет, 2021 йилда эса иккита супермаркет ва битта гипермаркет очиш режалаштирилмоқда. Улар Akfa Group’га тегишли умумий майдони 17,4 минг квадрат метр бўлган объектларда жойлашади.