Халқ таълими вазирлиги «Электрон таълим» лойиҳасида Хитой компаниялари билан ҳамкорлик қилади

Халқ таълими вазирлиги мамлакатдаги барча мактаб ўқувчиларининг юқори сифатли таълим олиши учун «Электрон таълим» лойиҳаларини амалга оширишни режалаштирмоқда. Бу ҳақда вазирлик матбуот хизмати хабар берди.

Хитой давлат кенгаши бош вазири Ли Кетсяннинг Ўзбекистонга ташрифи доирасида Халқ таълими вазирлиги Хитойнинг ZTE ва Huawei компаниялари билан «Халқ таълими тизимида замонавий ахборот-коммуникация технологияларини жорий этиш» лойиҳаларини амалга ошириш учун келишувларни имзолади.

Келишувлар доирасида хитойлик компаниялар ўз ҳисобларидан бир неча мактабларда замонавий ахборот-коммуникация технологияларини жорий этиш бўйича пилот лойиҳаларни амалга оширади. Лойиҳа натижаларига кўра, жорий этилган технологияларнинг таълим сифатини оширишдаги ва мактаб бошқарув тизимидаги самарадорлиги ўрганиб чиқилади.

Лойиҳалар ижобий натижа кўрсаца томонлар Хитой молия ташкилотларидан маблағ жалб қилган ҳолда ахборот технологияларини босқичма босқич жорий этиш масалаларини ўрганиб чиқади.

Бундан ташкари, ўзбекистонлик мутахассислар Хитойнинг мактабларда замонавий ахборот технологияларини жорий этиш бўйича илғор тажрибасини ўрганишлари кутилмоқда.