Суриянинг Телль-Обод шаҳридаги портлашда 19 нафар аҳоли вакили ҳалок бўлди

Суриянинг Туркия билан шимолий чегара ҳудуди яқинидаги Телль-Обод шаҳрида портлаш рўй бериши оқибатида 19 нафар тинч аҳоли вакили ҳалок бўлди, 29 нафар одам турли даражадаги тан жароҳатлари олди. Бу ҳақда «РИА Новости» хабар берди.

Хабарга кўра, портлаш миналаштирилган автомобилдаги бомбанинг ҳаракатга келтирилиши натижасида амалга ошган.

Аввал Анадолу ахборот агентлиги портлаш натижасида камида ўн кишининга ҳалок бўлганини хабар қилганди.

«Сурия шимоли-шарқидаги Телль-Обод шаҳри марказидаги бозор ҳудудида миналаштирилган машинанинг портлаши натижасида 19 нафар одам қурбон бўлди, 29 нафар аҳоли вакиллари эса турли даржадаги тан жароҳатларини олган» – дея таъкидлаган «РИА Новости»га интервью берган ҳукумат вакили.

Сурия шимоли-шарқидаги Туркия билан чегара ҳудудида 9 октябрда Анқара томонидан курдларга қарши «Тинчлик булоғи» ҳарбий операцияси бошланган. Ражаб Тоййиб Эрдўғоннинг ушбу ҳарбий ҳаракатлардан кўзлаган мақсади «Сурия демократик кучлари», ИШИД ҳамда «Курдистон ишчи партияси» жангариларини ушбу ҳудуддан сиқиб чиқариб, қочоқлар учун махсус «хавфсиз зона» яратишдан иборат. Туркиянинг ушбу ҳаракатларини дунё мамлакатлари кескин қоралаган. АҚШ Анқарага қарши санкциялар қўллаган. Германия, Франция ва Канада қурол-яроғ сотишни тўхтатган.

17 октябрда Туркия президенти Ражаб Тоййиб Эрдўғон ва АҚШ вице-президенти Майк Пенс ўртасидаги музокаралардан кейин «Тинчлик булоғи» операцияси курдлар «хавфсиз зона» ҳудудини тарк этиши учун 120 соатга тўтатилди. АҚШ эса Анқарага нисбатан қўлланилган санкцияларни бекор қилди.22 октябрда Россия президенти Владимир Путин ҳамда Туркия давлат раҳбари Ражаб Тоййиб Эрдўғон Сочи шаҳрида Суриядаги вазиятни муҳокама қилди ва олти ярим соат давом этган суҳбатдан кейин «Тинчлик булоғи»ни яна 150 соатга тўхтатиш ва қочоқлар учун «хавфсиз зона» ҳудудида қўшма патрул тадбирлари ўтказиш юзасидан меморандум имзолади. Эрон ушбу меморандумни қўллаб-қувватлаган, АҚШ эса Туркияни бу йўналишда Россия билан эмас НАТО билан ҳамкорлик қилишга чақирган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.