Ироқдаги норозилик намойишларида ҳалок бўлганлар сони 250 нафардан ошди

1 октябрдан буён давом этаётган Ироқдаги норозилик намойишида ҳалок бўлганлар сони 250 нафардан ошди, деб хабар берди Al Jazeera.

Хабарга кўра октябрь ойи давомида Бағдод ва мамлакатнинг бошқа шаҳарларида бўлиб ўтаётган норозилик намойишлари вақтида ҳалок бўлганлар сони 250 нафардан ошган.

30 октябрь куни тонгда полициячилар билан тўқнашувнинг ўзида 14 нафар фуқаро ҳалок бўлган ва юзлаб одамлар турли даражадаги жароҳатлар олган.

Аввал Бағдодда ҳукуматга қарши норозилик намойишлари бўлиб ўтаётгани сабабли комендантлик соати эълон қилинганди. Ироқдаги намойишчилар мамлакатдаги ишсизлик, хизмат кўрсатишининг сифатсизлиги ва ҳукумат тизимларида порахўрликнинг чуқур илдиз отиб кетганлигига нисбатан норозилик билдирмоқда.Инсон ҳуқуқлари бўйича Ироқ олий комиссияси Бағдоддан 100 километр жанубдаги Карбало шаҳрида бўлиб ўтаётган норозилик намойишларида ҳуқуқ-тартибот идоралари ҳамда халқ ўртасида юзага келган тўқнашувда 18 нафар одам ҳалок бўлгани ва 800 га яқин одамнинг турли даражадаги тан жароҳатлари олганлигини эълон қилган.

Ироқнинг бир нечта вилоятида ҳукуматга қарши норозилик намойишлари 1 октябрда бошланган. Кучишлатар тизим ҳамда халқ ўртасидаги тўқнашувлар натижасида 157 нафар одам: 149 нафар фуқаро ва 8 нафар хавфсизлик хизмати ходимлари ҳалок бўлган, қарийб 3,5 минг одам турли даражадаги тан жароҳатлари олган. Кейинчалик Ироқдаги инсон ҳуқуқларини ҳимоя қилиш ташкилотлари мамлакатда қайта бошланган ва ҳанузгача давом этаётган ҳукуматга қарши норозиликлар вақтида 63 нафар одамнинг ҳалок бўлгани ва 2,5 мингдан ортиқ одамнинг турли даражадаги жароҳати олганини хабар қилган.