Яқин икки йил ичида Тошкент шаҳрида халқаро бренддаги Carrefour супер ва гипермаркетлар тармоғи очилади. Бу ҳақдаги келишув 28 октябрь, душанба куни Дубайнинг Majid Al Futtaim компанияси ва Akfa Group ўртасида имзоланди. Бу ҳақда «Gazeta.uz» хабар берди.
Majid Al Futtaim компанияси томонидан маълум қилинишича, биринчи босқичда еттита, шу жумладан, 2020 йилда учта супермаркет ва битта гипермаркет, 2021 йилда эса иккита супермаркет ва битта гипермаркет очиш режалаштирилмоқда. Улар Akfa Group’га тегишли умумий майдони 17,4 минг квадрат метр бўлган объектларда жойлашади.
Akfa Group’нинг чакана савдо бўйича бўлинмаси ҳисобланган Atlas раҳбари Алишер Абдувоҳидовнинг қайд этишича, Majid Al Futtaim билан музокаралар 2017 йилнинг февраль ойидан буён олиб борилган. Унинг ишонч билдиришича, Carrefour тармоғининг очилиши халқаро стандартларнинг жорий қилиниши ва маҳсулотлар сифатининг ошиши ҳисобига Ўзбекистонда чакана савдонинг ривожланишига ижобий таъсир кўрсатади.
Carrefour’нинг Ўзбекистондаги дастлабки икки йиллик фаолияти давомида қарийб 2500 та иш ўрни яратилиши кутилмоқда. Супермаркетлар тармоғи харидорларга қарийб 40 минг номдаги маҳсулотни таклиф қилади ва мамлакат бўйлаб 600 дан ортиқ маҳаллий етказиб берувчилар, ишлаб чиқарувчилар ва фермерлар билан ишлайди.
Majid Al Futtaim БААдаги энг йирик компаниялардан бири бўлиб, Carrefour француз брендини франчайзинг асосида 37 та мамлакатда бошқаради ва 15 та мамлакатда мазкур тармоқнинг 285 дан ортиқ дўконига эга. Жорий йилда Уганда ва Ўзбекистонда супермаркетлар очилиши билан бу рақам 17 тага етади.
Изоҳ (0)