Яман жануби-шарқида номаълум шахслар томонидан магистрал нефть қувурига ҳужум уюштирилди. Ушбу маълумотни Яман ҳукуматининг вакили ҳам тасдиқлаган, деб ёзмоқда Sinxua.
Хабарга кўра, қувурдан кунига тахминан 15 минг баррель нефть ўтказилади ва унинг асосий улуши экспорт қилинади.
Содир бўлган ҳодиса юзасидан мамлакатдаги ҳеч қайси жангари гуруҳ масъулиятни ўз зиммасига олмаган. Эътиборли жиҳати ушбу ҳудудда нефть қувурига биринчи марта ҳужум уюштирилаётгани йўқ ва октябрь ойининг ўзида иккинчи марта айнан қувурнинг портлаган қисмига зарба берилган.
«Ал-Қоида» ташкилоти аъзолари ва ИШИД террорчилари Яманнинг тоғли ҳудудларида фаол ҳаракат қилади ва мамлакат ҳукуматига қарашли объектларга тез-тез бу каби ҳужумларни уюштиради, дея ёзган агентлик.
Нефть қувурини қайта тиклаш, таъмирлаш ишларига қанча вақт сарфланиши номаълум. Яман ҳукумати кўп йиллардан бери тўхтаб қолган нефть экспортини 2019 йил бошида тиклашга муваффақ бўлганди, шундан буён террорчи гуруҳлар ёнилғининг ишлаб чиқарилишига турли йўллар билан халақит қилишга уриниб келади.
Сентябрда Саудия Арабистонидаги Saudi Aramco нефть заводларига дронлар ҳужуми уюштирилиши натижасида мамлакатда нефтни ишлаб чиқариш икки бараварга қисқарганди. Ҳужум бўйича масъулиятни Ямандаги хусий жангарилари ўз зиммасига олган, кейинроқ АҚШ ҳамда Саудия Арабистони ушбу ҳужумлар ортида Эрон турганини билдирган.
Мавзуга доир: Эрон ташқи ишлар вазири Саудия Арабистони билан низоларни ҳал этиш учун Ар-Риёдга боради
Изоҳ (0)