Фарғона водийсида картошка етиштиришни ривожлантириш истиқболлари хорижий ва маҳаллий мутахассислар томонидан муҳокама қилинди

16 октябрь куни Фарғона водийсида картошка етиштиришни ривожлантириш лойиҳаси натижалари ва эришган ютуқларини намойиш қилиш мақсадида «Картошка етиштириш истиқболлари» мавзусида тадбир бўлиб ўтди. Бу ҳақда тадбир ташкилотчилари «Дарё»га маълум қилди.

Ушбу тадбир Европа Иттифоқи билан ҳамкорликда молиялаштирилаётган ва Германия халқаро ҳамкорлик жамияти (GIZ) бошчилигидаги консорсиум томонидан амалга оширилаётган «Қишлоқ ҳудудларини барқарор ривожлантириш лойиҳаси» ташаббуси билан ташкил этилди.

Картошка етиштириш борасида ўттиз йиллик тажрибага эга малакали мутахассис, француз эксперти Мишель Мале Фарғона водийсида олиб борилган изланишлари акс эттирилган картошка етиштириш, кўпайтириш ва сақлаш мавзусига бағишланган ўзбек тилидаги китобини тақдим этди.

Ушбу китоб амалий қўлланма бўлиб, асосан фермерлар ва талабалар учун муҳим аҳамиятга эга.

Тадбир қатнашчилари 2018 йил лойиҳа доирасида барпо этилган ва «Инновацион Агро Сервис» ишлаб чиқариш кооперативи бошқарувига берилган совутгичли омборхонага ҳам ташриф буюрди.

Совуқхона 100 тонна картошка уруғини сақлашга мўлжалланган ва картошка етиштирувчи фермерлар ва томорқа эгаларини уруғ билан таъминлашга хизмат қилади. Бундан ташқари, яқин кунларда лойиҳа доирасида айни шу ҳудудда картошка чипслари ишлаб чиқаришни йўлга қўйиш белгиланган. Бунинг учун Европада тайёрланган чипс ишлаб чиқариш линияси сотиб олинган ва тез кунларда Андижонга олиб келинади.

Мишель Мале ўзининг Ўзбекистондаги фаолияти таассуротларини қуйидагича изоҳлайди:

«Ушбу лойиҳа мен ишлаган энг кенг кўламли лойиҳалардан бири бўлди. Икки йил давомида биз турли гуруҳ вакиллари картошка етиштирувчилар, техник ходимлар, ўқитувчи ва талабаларни ўқитиш имкониятига эга бўлдик. Бир вақтнинг ўзида синфдаги дарсларни даладаги амалиёт навларни аниқлаш, зараркунанда ва касалликларга қарши кенг кўламли курашиш каби тадбирлар билан уйғунлаштириб олиб бордик. Бундан ташқари, ишлаб чиқариш кооперативи ташкил этилиши жараёнида иштирок этаётганимдан хурсандман. Ушбу кооператив юксак муваффақиятларга эришишига умид қиламан».