Лэмпарднинг ақлли режаси, Италия клубларининг муваффақияти ва омадли «Барселона». ЕЧЛда тур тафсилотлари

«E» гуруҳи

Гуруҳ етакчиси «Наполи» Австрияга сафар қилди ва «Зальцбург» билан баҳс олиб борди. Таъкидлаш жоиз, мазкур ўйин неаполликлар учун осон кечмади. Икки бор ортда қолаётган майдон эгалари ҳисобни тенглаштиришга муваффақ бўлди. Бироқ охир-оқибат тажриба ўз сўзини айтди ва Карло Анчелотти шогирдлари уч очкога эга чиқди. Мазкур баҳсда «Зальцбург»нинг 19 ёшли ҳужумчиси Эрлинг Ҳоланд дублга эришган ҳолда Чемпионлар Лигаси тўпурарига (6 та гол) айланди. Шунингдек, мазкур ўйинда Дрис Мертенс «Наполи»даги голлари сони (116) бўйича Диего Марадонадан (115) ўзиб кетди.

Гуруҳнинг кейинги ўйинида «Ливерпуль» «Генк» майдонида меҳмон бўлди. Ўйинда кутилганидек амалдаги чемпион осонлик билан ғалабани қўлга киритди. Ўтган мавсумни жароҳат сабаб ўтказиб юборган Алекс Окслейд-Чемберлен дублга эришди, футболчи ушбу мусобақада сўнгги бор бир ярим йил аввал гол урганди. Садио Мане ва Муҳаммад Салоҳ эса бир мартадан ўз ҳисобларига гол ёздириб қўйди.

Гуруҳда 7 очко билан «Наполи» етакчиликни давом эттирмоқда, ундан бир очко кам жамғарган «қизиллар» кейинги ўринни эгаллаб турибди.

«F» гуруҳи

Сўнгги вақтларда ўзининг юқори формасига чиқиб бораётган «Барселона» Прагага борди. Ўйиндан аввал «Славия» яққол аутсайдер сифатида эътироф этилаётганди, бироқ чехияликлар клуби бу сафар ҳам мўъжиза кўрсатишига бироз омад етишмади холос. «Барселона» 3-дақиқадаёқ Лионель Мессининг голидан кейин олдинга ўтиб олди ва шундан кейин бироз ҳотиржамликка берилди. Буни мезбонлар иккинчи бўлим бошида жазолашга муваффақ бўлди, бироқ орадан кўп вақт ўтмай ёқимсиз рикошет сабаб, майдон эгалари дарвозаси яна ишғол этилди. Ўйин якунланиши арафасида прагаликлар босимни оширди, аммо «кўк-анорранглилар» посбони бир неча вазиятда жамоасини қутқариб қолишга эришди.

Гуруҳнинг иккинчи учрашувида «Интер» клуби ўз майдонида «Боруссия Дортмунд» билан тўқнаш келди. Ўйин тенг курашлар остида кечган бўлсада, миланликлар вазиятлардан унумли фойдалана олди. Лаутаро Мартинес ва Антонио Кандреванинг голлари Антонио Конте жамоасига сув ва ҳаводек зарур бўлган уч очкони тақдим этди.

Мазкур ғалабадан кейин «Интер» очколарини 4 тага етказиб олган ҳолда дортмундликларга етиб олди. Улардан уч очко кўп жамғарган «Барселона» гуруҳда пешқадам бўлиб турибди.

«G» гуруҳи

Мазкур гуруҳдаги вазият тобора қизиқарли тус олмоқда. Икки етакчи жамоанинг бу турдаги мағлубиятидан сўнг ушбу квартетда тенг кучли жамоалар йиғилганини билиб олиш қийин эмас. 2-турдан кейин 4 очко билан пешқадамлик қилаётган «Зенит» сафарда «Лейпциг» билан баҳс юритди. Дастлаб Ярослав Ракицкининг голидан кейин олдинга ўтиб олган руслар иккинчи бўлимда ўз дарвозасидан иккита тўп олиб чиқди.

Гуруҳдаги иккинчи ўйинда «Бенфика» драматик баҳсда «Лион»дан устун келди. Ўйин аввалида олдинга чиқиб олган лиссабонликлар 70-дақиқага келиб ўз дарвозаларидан тўп ўтказиб юборди. Ўйиннинг асосий вақти якунланишига беш дақиқа қолганида Пицци мезбонларга ғалаба келтирган голга муаллиф бўлди.

3-турдан сўнг «Лейпциг» 6 очко билан гуруҳ пешқадамига айланди. Ундан кейин тўрт очкодан жамғарган «Зенит» ва «Лион» бормоқда. Ушбу турда мавсумдаги илк очкосини қўлга киритган «Бенфика» сўнгги поғонани банд этган.

«H» гуруҳи

Турнинг марказий ўйинларидан бири мазкур гуруҳ вакиллари «Аякс» ва «Челси» ўртасида кечди. Тажриба ва ёшлик шижоатини ўзида уйғунлаштирган жамоалар ўртасидаги тўқнашув кўпчиликни бефарқ қолдирмади. Ўйин тезкор ва ҳужумларга бой бўлгани билан ҳисоб камтарона кўриниш олди. Дастлабки бўлимда амстердамликлар фаолроқ кўринди, бироқ танаффусдан сўнг «Челси» ўз ўйинига темп қўша олди. Айниқса Фрэнк Лэмпарднинг амалга оширган ўзгаришлари ўйин натижасини ҳал қилиб берди. Захирадан майдонга тушган Кристиан Пулишич ва Миши Батшуайиларнинг ҳаракатларидан кейин ҳисоб очилди. Бу гол учрашувда ягоналигини сақлаб қолди.

Гуруҳдаги нариги ўйин кескинлик борасида биринчисидан қолишмади. «Лилль» ўз майдонида «Валенсия»ни қабул қилди. Учрашувда майдон эгалари ташаббусга эга бўлди, бироқ испанлар саноқлик имкониятлардан бирини гол билан якунлашга муваффақ бўлди. Шундан кейин ташаббус буткул французлар томонига ўтди, кетма-кет ҳужумлар 95-дақиқага келиб ўз самарасини берди ва «Лилль» ушбу мавсумдаги илк очкосига эга бўлди.

Гуруҳда «Челси» ва «Аякс» 6 очко билан пешқадамлик қилмоқда. «Валенсия» эса (3) учинчи ўринга тушиб кетди.

Нодирхон Ҳамидхонов тайёрлади