Ироқдаги тартибсизликлар вақтида 149 нафар фуқаро ва 8 нафар ҳарбий ҳалок бўлган

Октябрь бошида Ироқда содир бўлган норозиликларда 149 нафар фуқаро ҳамда 8 нафар ҳарбийнинг ҳалок бўлгани, 3,5 мингга яқин ироқлик фуқароларнинг турли даражадаги тан жароҳатлари олганлиги хабар қилинди. Бу ҳақда содир бўлган воқеалар бўйича суриштирув ўтказган комиссия ҳисоботига асосланиб «ТАСС» хабар берди.

«Норозилик намойишлари вақтида 149 нафар фуқаро, 8 нафар ҳарбий ҳалок бўлган, 3458 нафар одам турли жароҳатлар олган», — дейилган ҳисоботда.

Комиссия аъзолари ҳуқуқ-тартибот органлари ходимлари норозилик иштирокчиларига нисбатан ҳаддан ортиқ куч ишлатгани ва ўқотар қуроллардан фойдалангани натижасида ҳалок бўлганлар сони ошиб кетганлигини қайд этди. Шунингдек, ҳисоботда кучишлатар тизимнинг фавқулодда ҳолатда қандай ҳаракат қилишни билмаслиги халққа нисбатан зўравонликнинг ортиб кетишига сабаб бўлганлиги таъкидланган ва зўравонликлар юзасидан ҳарбийларга «юқоридан буйруқ бўлган ёки бўлмаганлиги» бўйича ахборот берилмаган.

1 октябрда Ироқнинг бир нечта вилоятида қашшоқлик, ишсизлик ва коррупция сабаб мамлакат ҳукуматига қарши норозилик намойишлари бошланган. Бағдод аҳолиси ва Ироқнинг жанубий ҳамда шимолий вилоятларида яшовчи фуқаролар ҳукумат истеъфосини талаб қилган. Дастлаб хотиржам руҳда бошланган митинглар тезкорлик билан полициячи ва ҳарбийлар билан норозилик билдираётган халқ ўртасида тўқнашувларга уланиб кетган. Ироқ ҳукумати Бағдод ва бошқа шаҳарларда ўтказилган оммавий норозилик намойишларидан сўнг мамлакат аҳолисининг аксарият қисми учун интернетга киришни тақиқлаб қўйганди.