Самарқанд вилоятининг Иштихон тумани «Қорақўйли» маҳалласида жойлашган «Камолот уйлари» янги қурилган бўлса-да, уйларда яшовчи аҳоли турли муаммолар ичида яшамоқда. Канализация суви уйлардан 20 метр узоқликда ер устига чиқади. Бу ҳақда MY5 телеканалининг «Марказий студия» дастурида эфирга узатилган репортажда маълум қилинган.
Аҳоли вакилларининг сўзларига кўра, уйлар атрофида тўпланган канализация сувидан кўтарилган ҳид уйларга киради.
Уйлардан бирида яшовчи аёлнинг айтишича, канализация суви уйларга ичимлик суви чиқариб берувчи қувурнинг устида тўпланиб қолган. Бу эса етказиб берилаётган ичимлик сувининг сифатга таъсир қилмоқда.
Бошқа бир уй бекаси эса уйларнинг ертўласида тўпланган сув сабабли уйларнинг қулаб тушишидан хавотир билдирган ва томлардан сув ўтиб кетганидан шикоят қилган.
Репортажда уй атрофида тўпланиб қолган канализация суви атрофида ёш болаларнинг ўйнаб юрганини кўриш мумкин.
Ўзини туман ҳокимининг қурилиш масалалари бўйича ўринбосари деб таништирган мутасадди шахснинг таъкидлашича, мазкур ҳудуд 2020 йил дастурига асосан канализация билан таъминланади.
Изоҳ (0)