Ўзбекистоннинг ташқи савдо айланмаси ҳажми 2019 йилнинг январь—сентябрь ойларида 31,6 миллиард долларни ташкил этди. Бу кўрсаткич ўтган йилнинг шу даврига нисабатан 8,5 миллиард долларга ёки 37,2 фоизга ўсган. Бу ҳақда Давлат статистика қўмитаси томонидан маълум қилинди.
Статистика қўмитаси маълумотларига кўра, ушбу кўрсаткичда экспорт ҳажми 13,6 миллиард доллар ва импорт ҳажми 17,9 миллиард долларни ташкил қилади. Бунда ўсиш кўрсаткичи мос равишда 45,5 фоиз ва 31,5 фоизни ташкил этган. Мазкур даврда 4,2 миллиард доллар қийматида салбий ташқи савдо салдоси қайд этилган.
Қайд этилишича, Ўзбекистон жаҳоннинг 181 дан ортиқ мамлакати билан савдо алоқаларини амалга ошириб келмоқда. Республика ташқи савдо айланмасининг асосий қисми Хитой (18,7 фоиз), Россия (14,9 фоиз), Қозоғистон (8,3 фоиз), Жанубий Корея (6,6 фоиз), Туркия (5,8 фоиз), Германия (2,4 фоиз) ва Қирғизистон (2 фоиз) ҳиссасига тўғри келган.
Қўмита ҳисоботига кўра, 2019 йилнинг учинчи чорагида ташқи савдо айланмаси ҳажми 11,9 миллиард долларни ташкил этган ва жорий йилнинг иккинчи чораги билан таққослаганда 16,4 фоизга ўсган.
2019 йилнинг учинчи чорагида ташқи савдо айланмаси умумий ҳажмида импорт ҳажмининг 58,1 фоиздан 56,2 фоизга камайиши, экспорт улушининг эса 41,9 фоидан 43,8 фоизга кўпайиши кузатилган.
Тўққиз ой якунларига кўра, МДҲ мамлакатлари билан савдо ҳажми 10,7 миллиард долларни ташкил қилган ва Ўзбекистон ташқи савдо айланмасидаги улуши 33,8 фоизга етган. МДҲ мамлакатлари билан ташқи савдонинг қарийб 37,7 фоизи, шундан экспортнинг 42,6 фоизи ва импортнинг 33,9 фоизи қўшни мамлакатлар ҳиссасига тўғри келган.
Ҳисобот маълумотларига кўра, бошқа хорижий давлатларнинг ташқи савдо айланмасидаги улуши 66,2 фоизга етиб, 20,9 миллиард долларни ташкил қилган ва ўтган йилнинг мос давридаги ташқи савдо айланмасига нисбатан 47,8 фоизга ўсган.
Ташқи иқтисодий фаолият бўйича 20 та йирик ҳамкор давлат қаторидан бешта давлатда ижобий ташқи савдо баланси кузатилган, хусусан, Афғонистон (424,2 миллион доллар), Қирғизистон (423,7 миллион доллар), Тожикистон (104 миллион доллари), Франция (44 миллион доллар) ва Эрон (6,1 миллион доллар). Қолган 15 та давлат билан салбий ташқи савдо баланси сақланиб қолмоқда.
Изоҳ (0)