Учқўрғон туман маъмурий суди томонидан ўтказилган сайёр суд мажлисида тиббиёт ходимларини ҳақоратлаб, беморлар тинчини бузган шахсларга нисбатан маъмурий ишлар кўриб чиқилди. Бу ҳақда «Дарё»га суд раиси Озоджон Зиёвуддинов маълум қилди.
У.Бобомурод 2019 йил 2 сентябрь куни соат 16:30 атрофида спиртли ичимлик ичгани сабабли йиқилиб, қўлини синдириб олади. Шундан сўнг Норин туман марказий шифохонасига бориб, рентгенга тушиш учун навбатда турганида ҳеч бир сабабсиз хизмат вазифасини бажараётган врачларни сўкиб, бақир-чақир қилади. Аввалига уни тинчлантиришга уринишади. Мастлиги сабаб бунинг имкони бўлмагач, шифохона мутасаддилари туман ИИБга мурожаат қилади.
Ички ишлар ходимлари келганидан кейингина У.Бобомурод ҳовуридан тушади. Унга нисбатан маъмурий баённома расмийлаштирилиб, тўпланган ҳужжатлар судга юборилади.
Судда жабрланувчи Я.Раззоқов марказий шифохонада рентгенолог бўлиб ишлаши, 2 сентябрь куни беморларни қабул қилаётганида навбатга турган У.Бобомурод уни ва бошқа врач-ҳамшираларни ҳақоратлагани ҳақида кўрсатма беради.
Учқўрғон туман маъмурий суди У.Бобомуродни Маъмурий жавобгарлик тўғрисидаги кодекснинг 183-моддасида кўрсатилган ҳуқуқбузарликни содир этган деб топиб, 5 сутка маъмурий қамоқ жазоси тайинлади.
2019 йил 17 сентябрь куни М.Хуршид ҳам маст ҳолатда йиқилиб тушиб, қўли лат ейди ва соат 17:00 атрофида Норин туман марказий шифохонасида боради. Бу ерда шифокорларни ҳақоратлаб, беморлар тинчини бузади.
Навбатчи шифокор уни ўзини тутиб олишга чақирганида, аксинча, баттар авжига чиқади. Шундан сўнг ҳуқуқ-тартибот идораларига мурожаат қилишга тўғри келади. Ички ишлар ходимлари томонидан унга нисбатан тегишли тартибда маъмурий баённома расмийлаштирилади.
Учқўрғон туман маъмурий суди томонидан ушбу иш кўриб чиқилиб, М.Хуршид Маъмурий жавобгарлик тўғрисидаги кодекснинг 183-моддасида кўрсатилган ҳуқуқбузарликни содир этган деб топилди. Унга нисбатан 7 сутка маъмурий қамоқ жазоси тайинланади.
Изоҳ (0)