«Қандим» мажмуасида газни қайта ишловчи завод тўлиқ қуриб битказилгани ва тегишли инфраструктура яратилиши муносабати билан давлат қабул комиссияси далолатномасини имзолаш маросими бўлиб ўтди.
Корхонанинг маъмурий биносида ўтказилган ушбу маросимда давлат ва жамоат ташкилотлари вакиллари, завод ишчи-муҳандислари ва оммавий ахборот воситалари вакиллари иштирок этди.
«Қандим» газни қайта ишлаш мажмуаси қурилиши 2016 йил апрель ойида бошланган ва бу газ конденсати кони Россиянинг «Лукойл» нефть компанияси билан ҳамкорликда «Қандим—Хаузак—Шоди—Қўнғирот» маҳсулот тақсимоти битими доирасида бунёд этилган.
5 гектар ҳудудни қамраб олган мажмуа Қоракўл туманининг олис чўл ҳудудида жойлашган. Унда 500 километр технологик ва қувур тармоқлари, 285 километр автомобиль йўли, 50 километрли темир йўл, 268 километрли электр таъминоти тизимлари, 71 та қудуқ, 220 километр бўлган йиғув тизими иншоотлари, 70 километрга тенг экспорт қувури, 55 километр узунликдаги сув таъминоти тизимлари барпо этилган.
«Lukoyl Uzbekistan Opereyting Kompani» МЧЖ томонидан ҳар бирининг табиий газни йиллик қайта ишлаш қуввати 4,05 миллиард кубометрга тенг бўлган 2 та технологик тизимдан иборат газни қайта ишлаш заводи, таъмирлаш ҳудудлари ва завод қошидаги бошқа объектлар, шунингдек, 1150 кишига мўлжалланган турар жой бинолари тўлиқ ишга туширилиб, Давлат қабул комиссиясига топширилган.
— «Қандим конлар гуруҳида газни қайта ишлаш мажмуаси қурилиши ва ишга туширилиши» инвестиция лойиҳаси тўлиқ қуриб битказилди. Унинг ишлаб чиқариш қуввати йилига 8 миллиард метр куб табиий газни қайта ишлашга мўлжалланган. Умумий инвестиция ҳажми эса 3,5 миллиард долларга тенг. Мажмуа тозаланган табиий ёқилғи, барқарор газ конденсати ҳамда қумоқланган ва грануляцияланган олтингугуртни ишлаб чиқариш учун таркибида сероводород мавжуд бўлган газни қайта ишлашга имкон яратади. Республикадаги газни қайта ишлаш соҳасида энг охирги ишга туширилган мазкур заводда замонавий технология ва замонавий бошқарув тизимлари жорий этилган, — дейди «Ўзбекнефтгаз» акциядорлик жамияти департамент бошлиғи Алишер Баҳодиров «Дарё»га берган интервьюсида.
Давлат қабул комиссияси далолатномаси имзолангунга қадар ҳар бир жиҳат ишчи комиссия томонидан чуқур кўриб чиқилган. Таклиф, тавсиялар ва эътирозлар юзасидан амаллар тўлиқ бажарилган. Мажмуадаги ҳар бир ишчи-ходимнинг хавфсизлиги ва меҳнат муҳофазаси юқори даражада таъминлангани ўрганилган. Махсус кийим-бош, шахсий ва жамоавий ҳимоя воситалари кўздан кечирилган.
Шунингдек, хоналарнинг шинамлиги, ёруғлиги, ҳавонинг айланиш тезлиги, ходимларнинг ишлашида уларнинг саломатлигига таъсир ўтказиши мумкин бўлган ҳолатларгача ўрганиб чиқилган. Ишчи комиссиянинг якуний хулосасига кўра, мажмуанинг ҳар бир жиҳати давлат стандартлари даражасига жавоб бергандан кейингина тайёр, деб ҳисобланган ва Давлат комиссияси томонидан қабул қилинган.
Давлат қабул комиссияси таркибига Энергетика, Бандлик ва меҳнат муносабатлари, Фавқулодда вазиятлар, Қурилиш вазирликлари, «Ўзбекнефтгаз» АЖ, Давлат энергетика назорати, Саноат хавфсизлиги бўйича давлат қўмитаси, «Ўздавнефтгазинспекция», ёнғин хавфсизлиги бош бошқармаси, Экология ва атроф-муҳитни муҳофаза қилиш давлат қўмитаси, касаба уюшмалари ташкилотлари, Бухоро вилоят ҳокимлиги ва бошқа давлат ташкилотлари вакиллари киритилган.
Маълумот ўрнида, тўла қувват билан ишлаётган мажмуадан 212 минг тонна соф олтингугурт, 134 минг тонна барқарорлаштирилган газ конденсати олинади, тозаланган табиий газ экспортга йўналтирилади.
Изоҳ (0)