Авиачипталар ва меҳмонхоналар буюртириш хизматини кўрсатувчи «Aviasales.uz» таҳлилчилари жорий йил бошидан авиачипталар бронланишини ўрганиб чиқиб, ўзбекистонликлар орасида энг талабгир авиайўналишларни аниқлади.
Ўзбекистонликлар ўртасида энг талабгир авиайўналишлар рейтингида 1-ўринни Москва эгаллаган. Россия пойтахтига Тошкентдан бориб-келиш авиачиптаси ўртача 2,9 миллион сўмга айланади. Мутахассисларнинг таъкидлашича, Москва ўзбекистонлик саёҳатчиларга Европага сафарни давом эттиришга имкон берувчи Тошкентга энг яқин транспорт тугуни ҳисобланади.
Талабгирлик бўйича 2-ўринни авиачипталар қимматлигига қарамай Сеул эгаллаган. Жанубий Корея пойтахтига Тошкентдан парвоз нархи ўртача 6 миллион сўмни ташкил қилади.
Олмаотага парвоз энг арзон йўналиш деб топилган. Ўзбекистонлик йўловчилар ушбу шаҳарга 1,9 миллион сўмга бориб-келиши мумкин.
Бундан ташқари, ўзбекистонликлар Санкт-Петербургга ҳам тез-тез учиб туради. Тошкентдан чипталар нархи 3,8 миллион сўмни ташкил этади.
Талабгир авиайўналишлар рейтингида 5-ўринни Истанбул эгаллаган. Ушбу йўналишга чипталар нархи 4,6 миллион сўм.
Шунингдек, Қозон ва Дубай ҳам талабгир йўналишлардан ҳисобланиб, бу шаҳарларга ва ортга 3,6 миллион сўмга парвоз қилиш мумкин.
Яна бир арзон йўналишлардан бири Қозоғистон пойтахти Нур-Султон бўлиб, ўзбекистонликлар ушбу шаҳарга 2,2 миллион сўмга учиб-қайта олади.
Талабгир йўналишлар орасида 9-ўринни Киев (5 миллион сўм), 10-ўринни эса Пекин (6 миллион сўм) эгаллаган.
Изоҳ (0)