Эверест баландлигини қайта ўлчаб кўришмоқчи. Тоғ зилзилалар натижасида чўккан бўлиши мумкин

Непал ва Хитой икки мамлакат чегарасида жойлашган Эверест тоғи баландлигини биргаликда қайта ўлчаб кўрмоқчи, деб хабар бермоқда ANI агентлиги.

The Times of India’нинг ёзишича, 12—13 октябрь кунлари Хитой Халқ Республикаси раиси Си Цзиньпиннинг Непалга ташрифи чоғида шундай қарорга келинган.

Қайта ўлчашга геологларнинг 2015 йили Непалда содир бўлган кучли зилзиладан сўнг Эверест чўккан бўлиши мумкин, деган тахмини сабаб бўлган.

Непал ҳукумати Эверест баландлигини ўлчашни 2017 йилда эълон қилган. 2019 йилнинг баҳорида эса тоғга бир гуруҳ альпинистлар юборилган. Ўлчов натижалари 2020 йил якунида эълон қилиш режалаштирилган.

Эверест баландлиги биринчи марта 1847 йилда Эндрю Во бошчилигидаги ҳиндистонлик экспедиция томонидан ўлчанган. Унда тоғнинг баландлиги 8 840 метрга баҳоланган.

Айни пайтда Эверестнинг расмий баландлиги 8 848 метр деб ҳисобланади. Бундай маълумот 1950 йилда Ҳиндистон геология хизмати томонидан тақдим этилган.