Сурхондарё вилоятининг Ангор туманидаги 19-умумтаълим мактабида синф хоналари етишмаслиги сабабли дарслар 4-смена ўтилмоқда. Бу ҳақда «Дарё»га журналист Наргиза Раҳматуллаева маълум қилди.
1994 йилда ҳашар йўли билан қурилган ушбу таълим даргоҳи 320 ўринга мўлжалланган бўлиб, айни пайтда мактабда 592 нафар ўқувчи таҳсил олади. Мактаб ўқитувчилари билан суҳбатда, ўқув хоналарнинг етишмовчилиги сабабли айрим дарслар (технология, меҳнат, «Атрофимиздаги олам») фан кабинетларида эмас, балки мактаб ҳовлисида ўтилишига аниқлик киритилди.
—Синф хоналари етишмаслиги сабабли дарсларни 4 сменада ўтишга мажбурмиз, — дейди биз билан суҳбатда мактабнинг ўқув ишлари бўйича директор ўринбосари Ғулом Хурсандов. — 1-навбат соат 08:00 да бошланади, унда 1-8-9-10-11-синфларга дарс берилади. 1-навбатнинг шу оралиғида биринчи синфларнинг дарси соат 11:20 да тугатилиши билан 2-синфларга дарс бошланади. Юқоридаги оралиқдаги дарсларни ҳисобга олганда тушдан сўнгги сменани 3-навбат деб ҳисобласа, соат 13:05 да 5-6-7-синфларга дарслар ўтилади. 4-навбатда, соат 14:45 да эса 4-синфларга қўнғироқ чалинади. Дарс соатларини қолдирмаслик учун дарс жадвалини шу тартибда тақсимлашга тўғри келди.
— Ушбу мактабда кўп йиллар раҳбарлик қилиб келганман,— дейди Халқ таълими аълочиси, меҳнат фахрийси Нурали Ражабов. — Нафақага чиққан бўлсам-да, кунора бу ерга келаман, ўқитувчилар билан гаплашаман. Бу ерда кузатув кенгаши раисиман. Мактабимиз 1994 йилда ҳашар йўли билан қурилиб, фойдаланишга топширилган. 2007 йилга келиб жорий таъмирдан чиқарилди. Қурилиш ишларига 30 миллион сўм ажратилган. Маблағнинг кам ажратилганлиги сабаб таъмирлаш ишлари номигагина бажарилганди. 2019 йилга келиб эса мактаб капитал реконструкциядан чиқарилди. Таъмирлаш ишлари ниҳоятда сифатли бажарилди. Бу ишлар учун қурувчиларга катта раҳмат айтсанг арзийди. Аммо бу билан муаммомиз бартараф этилди, дея олмайман. Синф хоналари етишмасли, спорт зали йўқлиги ўқувчиларнинг билим олишлари билан бирга ўзлари хоҳлаган спорт тури билан шуғуланишларида тўсиқ бўлиб келмоқда. Агар аҳвол шу даражада давом этса, набираларимизга аниқ фанлар ҳам кўчада ўтилади. Бу бўйича маҳалла оқсоқоллари билан билан келишиб кўп ташкилотларига, туман ҳокимига мурожаат қилдик. Аммо натижани кўриб турибсизлар.
Мактабда спортзалнинг йўқлиги бир талай муаммоларни юзага келтириб чиқармоқда. Мавжуд аҳвол билан яқиндан танишганимизда яна бир ҳолатга дуч келдик. Қарангки, бир вақтнинг ўзида жисмоний тарбия дарси битта ўқитувчи томонидан иккита синфга ўтилаётган экан.
—Шароит йўқлигидан бир вақтнинг ўзида 2-Д ва 2-Е синфларига жисмоний тарбия дарсини ўтяпман,—дейди жисмоний тарбия ўқитувчиси Холмамат Тўхтаев. — Спорт зали бўлмагани учун ҳатто ўқувчилар формасини алмаштириш учун хоналар йўқ. Шунинг учун ўқувчилар дарсда формасиз иштирок этмоқда.
Худди шундай ҳолатга 5-синфларнинг жисмоний тарбия дарсида гувоҳи бўлдик. 5-А ва 5-Д синф ўқувчилари биз билан суҳбатда жисмоний тарбия дарси иккала синфга қўшиб ўтилаётганлигини айтишди. Шунингдек, ўқувчилар меҳнат дарслари мактаб ҳовлисида ўтилиши ҳамда спорт зал йўқлиги туфайли ёмғирли кунларда жисмоний тарбия дарси ўтилмаслигини айтишди.
19-умумий ўрта таълим мактабидаги ушбу муаммо юзасидан Ангор туман халқ таълими бўлими мудири Номоз Мамадияров билан гаплашдик.
— Ҳақиқатдан ҳам 19-умумтаълим мактабида ўқувчилар сони кўп, синф хоналари етишмайди. Туманимизда 21, 33-умумтаълим мактабларида ҳам қўшимча ўқув биносига эҳтиёж сезилмоқда. Мазкур мактабларни Инвестиция дастурига киритиш учун юқори ташкилотларга таклиф берганмиз. Таклифимиз кўриб чиқилиб, 2020 йилга келиб қўшимча бино масаласи ҳал этилишига умид қилганмиз.19-умумтаълим мактабида юзага келган муаммодан ўқитувчи ва ўқувчилар бирдек қийналмоқда. Ҳадемай ёмғирли кунлар бошланади, мактаб ҳовлисида ўтиладиган дарслар синф хоналарга кўчирилса, галдаги навбатдаги дарс соатлари қай тартибда ўтилади? 4-навбатда ўқийдиган 4-синф ўқувчилари қишнинг қировли кунларида қош қорайгунча уйларига етиб оладими? Ёки дарс соатлари қисқартириладими?
Бу саволларга мутасадилардан жавоб кутиб қоламиз.
Изоҳ (0)