Аляскада келиб чиқиши жанубий африкалик бўлган 48 ёшли маҳаллий фуқаро Брайан Смит қотилликда айбланиб ҳибсга олинди, деб хабар бермоқда Meduza. Бунда жиноят фотосуратлари ва видеоси бўлган флешка тасодифан топиб олингани ёрдам берган.
Флешкани Анкориж шаҳрида яшайдиган аёл 30 сентябрь куни кўчадан топиб олган. Қайд этилишича, флешкада жиноятчи эркак аёлни калтаклаб, бўғаётгани тасвирланган 39 та фотосурат ва 12 та видеолавҳа бўлган. Видеолавҳаларнинг бирида эркак кишининг «Шунчаки... ўл» деган овози эшитилган. Сурат ва видеолар 4—6 сентябрь кунлари олинган.
Флешка Анкориж яқинида топилганидан 2 кун ўтгач, полиция аёлнинг жасадини топган. Полиция жасад фото ва видеотасвирга тушган аёлга тегишли деб тахмин қилган. Марҳуманинг исми ва қотил билан қандай алоқалари борлиги ҳозирча маълум қилинмаган.
Топиб олинган карта жиноят ишида асосий далил бўлган. Хабарда айтилишича, полиция Брайан Смитни фото ва видеолар орқали таниган. Чунки у аввал ҳам бошқа тергов ишига алоқадор бўлган (қандай тергов иши эканлигига аниқлик киритилмаган). Шунингдек, гумонланувчини аниқлашда видеодаги эркакнинг жанубий африкача акценти ёрдам берган.
Бундан ташқари, флешка ёрдамида қотиллик Анкориждаги TownePlace Suites меҳмонхонасида содир бўлгани аниқланган. Видеодаги гилам суратдаги гиламга мос келган. Қўшимча далилларни Смитнинг қўнғироқлари рўйхати берган. Аниқланишича, тахминан флешкадаги охирги расм суратга олинган вақтда у жасад топилган жойда бўлган.
Смит 8 октябрь куни Анкориж шаҳридаги аэропортда ушланиб, эртаси куни ҳибсга юборилган. Хабарда жиноят сабаблари хозирча номаълумлиги, тергов ишлари давом этаётгани айтилган.
Изоҳ (0)