Туркманистонда тухум инқирози давом этмоқда. Аҳоли одам бошига 10-15 донадан сотилаётган тухумни харид қилиш учун соатлаб навбат кутишига тўғри келмоқда.
Хусусий савдо нуқталарида тухумнинг донаси бир ярим манатгача нархда сотилмоқда, давлатга қарашли дўконлардан эса ҳар куни ўнлаб одамлар тухум келишини навбатда туриб кутмоқда. Якунда уйига тухум ололмай кетаётганлар ҳам учрамоқда.
Хабарга кўра, давлат дўконларида бир кишига кўпи билан 15 та тухум донасига 0,45 манатдан сотилмоқда. Бир йил аввал мамлакатдаги тухум нархи 0,33 манат бўлган.
Туркманистон пойтахти Ашхобод аҳолиси нарх ўсгани етмагандек давлат дўконларидан сотиб олинган тухумлардан кўнгилни айнитувчи дори таъми келаётганидан нолимоқда. Уй бекаларининг айтишича, тухум қовурилган вақтда бу таъмни кетказиш учун қуймоққа пиёз ва томат қўшишга тўғри келади, тухумлар ҳамир қориш, нон ёпиш ва пишириқлар пиширишга яроқсиз. Аҳоли вакиллари маҳсулот Эрондан келганини, Туркманистон валюта воситаларини тежаш учун энг паст сифатдаги товарларни сотиб олганини таъкидламоқда.
«Бошқа иложимиз йўқ. Бозордан қимматга тухум харид қилиш мумкин, аммо бунга ҳамманинг ҳам қурби етмайди», — дейди давлат дўкони олдида навбатда турган аёл.
Мавзуга доир:
Изоҳ (0)