Аввалроқ, «Қашқадарёда Damas ҳайдовчиларининг ҳужжати олиб қўйилиб, пахтага одам ташишга мажбур қилингани айтилмоқда» сарлавҳа остида мақола эълон қилинганди. Мақолада Косон туман ЙПХ инспекторлари ҳайдовчиларнинг ҳужжатини олиб қўйиб, ҳар куни пахтага бепул ҳашарчи ташишга мажбур қилингани ҳақида сўз борганди. Мақолага Косон туман ҳокимлиги муносабат билдирди.
Туман ҳокимлиги ахборот хизматининг ёзишича, пахтага ҳашарчи ташиш учун 77 та автобус жалб қилинган. Таъкидланишича, ҳашарчи ташишга хизмат қилаётган 77 та автобусларга хизмат ҳақи тўланади.
Туман ҳокимлиги ахборот хизматининг муносабатида шундай дейилади: «...мақолада айтилган 44 та Damas автомобиллари ҳайдовчиларининг ҳеч бири йўл ҳаракати хавфсизлиги бўлими инспекторлари томонидан тўхтатилмаган ва улар меҳнатидан фойдаланилмаган».
Шунингдек, мақолада Қаршидан Косонга қатновчи Damas ҳайдовчиларининг 50—60 фоизида автомобилининг техник паспорти йўқлиги ва ЙПХ ходимлари олиб қўйганлиги ҳам айтилади. Аммо бу кўрсаткичдаги йўловчи ташувчи ҳайдовчиларнинг техник паспорти аслида мавжуд эмас. Уларнинг кўп ноқонуний йўловчи ташиш билан шуғулланмоқда. Ўтказилган «рейд»ларда бундай ҳолатлар тўлиқ исботланган ва ноқонуний йўловчи ташиш билан шуғулланган ҳайдовчиларга тегишли чоралар кўрилган.
«Қарши—Косон» йўналишида ҳаракатланувчи 44 та Damas автомобилларининг 50—60 фоизида техник паспорт йўқ дейилмоқда. ЙПХ инспекторлари томонидан ўтказилган «рейд»ларда бу ўз исботини ҳам топган. Шундай бўлса-да, техник паспортсиз ҳаракатланаётган автомобилларга ноқонуний одам ташигани учун жарима қўлланиб, яна ўз фаолиятини юритишга қўйиб берилган. Ўз-ўзидан 50—60 фоизни ташкил қилувчи «дамасчилар» автомобилининг техник паспортисиз қандай ҳаракатланмоқда деган савол туғилади.
Туман ҳокимлиги ахборот хизматининг ёзишича, ЙПХ инспектори Акром Авазов ҳайдовчи Мурод Тўхтаевнинг Damas’и ҳужжатини олганини рад этиб, сўзига жавоб беришини ҳам айтибди.
«Мен пахта мавсуми бошлангандан бери ҳеч бир Damas ҳайдовчисини тўхтатганим йўқ. Чунки менга ҳашарчи ташиш билан шуғулланаётган автобусларни назорат қилиш топширилган. Агар кимнингдир техник паспортини олган бўлсам, албатта, сўзимга жавоб бераман. Лекин менда Мардон Тўхтаев исмли ҳайдовчининг ҳеч қандай техник паспорти йўқ», — дейди Акром Авазов.
Косон туман Йўл ҳаракати хавфсизлиги бўлими бошлиғи Шуҳрат Холматов «Дарё» мухбири билан суҳбати давомида «Агар англашилмовчилик сабаб ходимларимиз кимнингдир ҳужжатини олган бўлса, бугуноқ қайтариб берамиз», — деган. Муносабатда ёзилишича, «ГАИ»лар бошлиғи айтган гапидан қайтибди.
«Биз жорий йилнинг 10 сентябрида туман ҳудудида ‘Пахта—2019’ мавсумида ҳаракат хавфсизлигини таъминлаш мақсадида йиғилиш ўтказганмиз. Йиғилишда пахтага ҳашарчи ташишда автобуслардан фойдаланиш ҳақида бир қарорга келинган. Агар Damas ҳайдовчиларида ҳам ҳашарчи ташиш истаги бўлса, уларга хизмати учун ҳақ тўланишини тушунтирганмиз. Бироқ ҳеч бир ҳайдовчининг техник паспортини олиб пахтага бепул одам ташишга мажбурланмаган. Қизиқ томони шундаки, бизда автобуслар сони етарли бўлгани учун Damas’лар кучидан фойдаланишга эҳтиёж мавжуд эмас», — дейди Шуҳрат Холматов.
6 октябрь куни «Дарё» мухбири билан телефон орқали мулоқот қилган Мардон Тўхтаевнинг айтишича, ЙПХ ходими Акром Авазов журналист ушбу масалани суриштира бошлагач, 5 октябрь куни кундузи соат 10:00 да ҳужжатини қайтариб берган. Аммо 6 октябрь куни яна ҳашарчиларни манзилга элтишни сўраган.
Мардон Тўхтаевнинг билдиришича, у ЙПХ инспектори Акром Авазов топшириғи билан туманнинг Бойғунди қишлоғидан туман марказига қадар 6 нафар ҳашарчи аёлни бепул етказиб қўйган.
«Агар Акром Авазовнинг топшириғини бажарсам, етти нафар йўловчи олсам ҳам индамайди-да. Бўлмаса, 7 нафар йўловчи олган пайтларимиз тўхтатиб ‘гаранг қилишади’ », — дейди Мардон Тўхтаев.
Туман ҳокимлиги ахборот хизматининг ёзишича, Қаршидан Косонга қатновчи Damas’лар фаолиятини назорат қилувчи «Насаф аудио-видео» МЧЖ иш юритувчиси Мавжуда Уваева туман ҳокимлигида 10 сентябрь куни ўтказилган йиғилишда иштирок этмаган. Шу боисдан ҳам йиғилишдаги гапларни бошқача талқин қилган.
Косон туман ҳокимлиги ахборот хизматининг тезкор муносабати таҳсинга лойиқ, албатта. Бироқ хизмат вакилларининг масала моҳиятини чуқур англаб етмасдан кўриниб турган далилларни инкор этиши инсофданмас. Ҳокимлик ахборот хизмати масъулларининг шошгани ҳайдовчилар исм-шарифини чалкаштириш ва мақолада ЙПХ инспекторлари томонидан олиб қўйилгани айтилган техник паспортни йўловчи ташиш учун рухсатнома — лицензия билан адаштиргани ҳам исботлаб турибди.
Изоҳ (0)