Наманган вилояти Чуст тумани Ғова қишлоғида 21 сентябрь, шанба куни ўтказилган тўйда 18 нафар фуқаро овқатдан заҳарлангани ҳақида хабар берилган эди. Соғлиқни сақлаш вазирлиги мазкур ҳолат юзасидан ўрганиш ўтказди.
21 сентябрь куни Наманган вилояти Чуст тумани «Ғова» МФЙ ҳудудидан 18 нафар фуқаро қоринда оғриқ, кўнгил айниши, умумий ҳолсизлик, ич кетиши, тана ҳароратининг кўтарилиши белгилари билан туман тиббиёт бирлашмаси юқумли касалликлар шифохонасига мурожаат қилган. Улар «ўткир диарея» ташхиси билан шифохонага ётқизилди.
Беморларнинг 5 нафари эркаклар ва 13 нафари аёллар бўлган. Уларнинг айтишича, «Ғова» МФЙда яшовчи Н.Ш.нинг тўй базмида қатнашгандан сўнг, касаллик аломатлари бошланган.
Шифохонага ётқизилган беморлардан бактериологик текширув учун қон, ахлат, сийдик намуналари олиниб, туман ДСЭНМга юборилган. Барча беморлар шифокорлар томонидан чуқур тиббий кўрикдан ўтказилиб, керакли тавсифлар берилган. Беморларни даволаш ишлари қатъи назоратга олиниб, етарли даражада дори-дармонлар билан таъминланган.
Эртаси куни ўтказилган тиббий муолажалардан сўнг ҳолати яхшиланган 3 нафар беморга уйига жавоб берилди. 24 сентябрь, сешанба куни эса барча беморлар соғломлаштирилиб, уйига жавоб берилган.
Эпидемиологик суриштирув натижасида қуйидагилар маълум бўлди:
Ғова қишлоғида яшовчи фуқаро Н.Ш. уйида ўтказиладиган тўй маросими учун бузоқ сўйган, унинг гўштидан яхна тайёрлаган. Ушбу яхна гўштдан истеъмол қилган тўй эгаси ўғлининг ҳам кечки пайтда тана ҳарорати кўтарилган, Ғова ҚОП қошидаги тез ёрдам ходимлари муолажасидан сўнг аҳволи яхшиланган.
Суриштирув давомида тўй учун сўйилган бузоқ гўшти, овқат тайёрлаш учун ишлатиладиган сабзавотлар, қовун, тарвуз, узум маҳсулотлари ҳамда ичимлик суви сифатида ишлатилган булоқ сувидан лаборатория таҳлили учун намуналар олинган.
Шифокорлар ва ДСЭНМ ходимлари томонидан «Ғова» МФЙ ҳудудида аҳоли ўртасида юқумли ва юқумсиз касалликларнинг келиб чиқиши ва тарқалишининг олдини олиш юзасидан патронаж хизматини кучайтирган ҳолда тарғибот ишлари олиб борилмоқда.
Изоҳ (0)