Қирқ қулоқли қозон, 40 кг ош сиғадиган лаган, 5 минг долларлик ёғоч кема, дунёдаги энг катта сўзана. Қўқондаги ҳунармандчилик фестивалида намойиш этилаётган антиқа маҳсулотлар

Қўқонда бўлиб ўтаётган Халқаро ҳунармандчилик фестивалига Ўзбекистон ва дунёнинг турли бурчакларидан ҳунармандлар энг сара маҳсулотларини келтирган. Фестивалда иштирок этаётган «Дарё» мухбири уста ҳунармандларнинг иштирокчиларни ҳайратга соладиган маҳсулотлари ҳақида маълумот берди.

Риштонлик кулол Равшанбек Тожиддинов фестивалга оғирлиги 80 килограмм бўлган улкан сопол лаган билан ташриф буюрган. Диаметри 1,2 метр бўлган лаганга бир пайтнинг ўзида 40 килограмм ош сиғдириш мумкин.

Лаганни тайёрлаш учун кулол уч йил вақт сарфлаган. Унга 100 килограмм махсус лой ишлатилган ва қоронғи жойда бир ярим йил мобайнида табиий усулда қуритилган. Лаган юзасига нақш чизиб, уни қуритиш учун яна 6 ой вақт кетган.

Бағдодлик ҳунарманд Бахтиёр Шерматов уч ой давомида узунлиги 4,7 метр, баландлиги 3,5 метр келадиган елканли кема ясади. «Орзу» деб номланган бу кема Халқаро ҳунармандчилик фестивали учун махсус тайёрланган. Хорижий сайёҳлардан бири уни 5 минг АҚШ долларига сотиб олиш истагини билдирган, лекин ҳунарманд уни фестиваль якунлангунича сотмоқчи эмас.

Тошкент вилояти ҳудудидаги кўргазмалар орасидан жой олган, ёғочдан тайёрланган қирқ қулоқли қозон атрофи ҳам иштирокчилар билан гавжум. Уста Шавкат Юсупов томонидан ясалган бу қозон Амир Темур давридаги қирқ қулоқли улкан қозоннинг кичикроқ кўринишини эслатади.

Туркистонда қадимий масжид реконструкциясида иштирок этганимда Хўжа Аҳмад Яссавий зиёратгоҳида Амир Темур ясаттирган қирқ қулоқли қозонни кўриб, унинг кичикроқ нусхасини ясаш нияти туғилган эди. Бу қозонни Амир Темур музейига ҳадя қилиш мақсадида эдим. Бу қозон 4800 та ёғоч бўлагидан 5 йил давомида ясалган. Қозондаги араб ҳарфларидаги битикларни тажрибали ҳаттотларга аслидагидек ёздириб, ўша асосда ясаганман.

Шавкат Юсупов, ҳунарманд

Мазкур сўзана Нилуфар Жўраева ҳамда унинг 20 нафар шогирди томонидан 6 ой давомида яратилган. Сўзанани сурхонча сержило нақшлар ва ёрқин ранглар билан безаш учун 16 килограммдан ортиқ табиий усулда бўялган калава ип сарфланган.