ЎзА хабар беришича, Жиззах шаҳри марказидан Шароф Рашидов туманига олиб чиқадиган бир нечта йўл бор. Улардан бири шаҳарликлар томонидан Сарвар Азимов, туманликлар томонидан Шавкат Бобоев деб аталувчи кўча билан кесишган, на шаҳарга ва на туманга қарашли бўлган «Номсиз» кўча.
Кўчанинг чап тарафи Жиззах шаҳрига, ўнг томони эса Шароф Рашидов туманининг Совунгарлик маҳалласига қарашли. Ушбу «Номсиз», шу ерда яшовчилар тили билан айтганда, «Янги участкалар» кўчаси «нейтрал зона»да жойлашган, яъни эгасиз.
«Номсиз» кўчадаги паст-баланд қирлар қадим замонлардан қолмаган: у даврларда бетон ва асфалт, маиший чиқинди ва яроқсиз пластмасса идишлар, баклашкалар бўлмаган.
—«Жиззах йўл қурилиш» деган ташкилот кўчамизга турли қурилиш, маиший ва бошқа чиқиндиларни машина-машина олиб келиб тўкавериб, росмана чиқиндихонага айлантирди, — дейди «Номсиз» кўчада яшовчи фуқаро Қундуз Умматова. — «Нега бу ерга чиқинди тўкаяпсизлар? Қайтага кўчанинг икки томонига 2 та чиқинди қути қўйиб беринглар», десак, «Опа, бу кўча бизнинг захира еримиз. Тўккан ана шу шағал-у тупроқларни бошқа ковланган жойларга солиш учун олиб кетишимиз билан бу ерларга тунги ёритгичлар ўрнатиб, ойнадек текис асфалт ётқизамиз», — дейишди. Бунга ҳам анча бўлди. Биз соддалар шунга ишонибмиз.
3 йил бўлаяптики, «Номсиз» кўчадаги чиқинди тепаликлари сони ортса ортаяпти, баландлашса баландлашаяпти, аммо чиқиндиларни олиб чиқиб кетиш, бу жойга асфалт ётқизишдан дарак йўқ.
Изоҳ (0)