«Дарё» сайтида ҳафтанинг энг муҳим ва муҳокамали хабарлари шарҳини бошлаймиз.
Ҳафтамиз яхши янгилик билан бошланди. 10 сентябрь куни Тошкентда президент мактаби очилди. Шу куни президент «ўз мактаби»ни бориб кўрди. Мактаб 168 ўринли, ётоқхонаси бор, 15 ўринли ўқитувчилар меҳмонхонаси ҳам бор. Бу йил 5–10-синфлар учун 144 нафар ўқувчи қабул қилинган. Уларга 30 нафар чет эллик ва 72 нафар маҳаллий ўқитувчи дарс беради.
Шавкат Мирзиёев ўқувчиларни Ўзбекистоннинг «олтин фонди» деб таърифлади.
Президент мактаблари шу йили Нукус, Хива ва Наманганда ҳам очилади. 2020 йилда Бухоро, Жиззах, Қашқадарё, Самарқанд ва Фарғона вилоятларида, 2021 йилда Андижон, Навоий, Сурхондарё, Сирдарё ва Тошкент вилоятларида бунёд этилади.
* * *
«Кўп гўшт еяпмиз»... Фермерлар кенгаши раиси Актам Ҳайитовнинг бу изоҳи навбатдаги танқидлар-у ҳазил-мутойибалар мавзуи бўлди. Аслида у нима демоқчи эди? Ҳайитов мамлакатда гўшт нархи ошиши ва овқатланиш маданияти етишмаслигини изоҳлаш билан бирга озуқа захираси етишмаслигини ҳам эсга олиб ўтганди. Шу билан бирга, «Гўшт нархини икки баробар ошириш ниятимиз йўқ» деди. Ўзбекистон давлат статистика қўмитасининг маълумоти ҳам юртимизда гўшт истеъмоли ортганини тасдиқлайди: 2000-йиллар бошида жон бошига 34 кило гўшт маҳсулоти тўғри келган бўлса, бу сон 2016 йилда 44,4 килога етган.
Бу дунё мезонида кўпми ё камми? Жаҳоннинг ривожланган мамлакатларидаги кўрсаткичдан (кунига ўртача 165 граммдан кўп) паст, лекин Афғонистон ва аксарият Африка мамлакатлари билан таққослаганда — кўп. Демак, Африка ва Афғонистон билан солиштирганда биз кўп гўшт емоқдамиз.
Иқтисодчи ва блогер Беҳзод Ҳошимов Актам Ҳайитовнинг фикрини шарҳлаб, гўшт нархига таъсир кўрсатувчи омилларни санаб ўтди. Унга кўра, гўштга талаб таклифдан тезроқ ўсмоқда. Бу бизга нима қилиш кераклигини англатувчи сигналдир. Ҳошимов фермер гўшт етиштиришига ҳеч қандай маъмурий аралашув керак эмаслигини таъкидлади ва чет элдан гўшт олиб келиш учун барча тўсиқларни олиб ташлашга чақирди.Фермерлар кенгаши раисининг изоҳини жамоатчилик ҳазм қилиб улгурмасдан Энергетика вазирлиги тизимидаги жамият бош бошқармаси бошлиғи Абдурашид Мирзаев «Жуда кўп электр энергияси истеъмол қиляпмиз» деб, янги муҳокамаларга старт берди.
* * *
Сенатда тўйлар масаласи кўрилди ва қарор қабул қилинди. Қарорга кўра, тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирларни ўтказиш тартиби тўғрисидаги низом тасдиқланади ва 2020 йилнинг 1 январидан кучга киритилади.
Низомга кўра, оилавий тадбирлар фақат бир кун соат 06:00 ва 23:00 оралиғида ўтказилади. Дафн этиш маросими бундан мустасно. 23:00дан кейин оилавий тадбирлар ўтказилмайди. Оилавий тадбирларда 200 нафаргача, ош бериш маросимида 250 нафаргача киши қатнашади. Қўшалоқ тўй-ҳашамларда 250 нафаргача, у билан боғлиқ ош бериш маросимида 300 нафаргача киши қатнашиши мумкин. Келин-куёв кортежи кўпи билан учта машинадан иборат бўлади. «Келин навкари», «чорлар», «ота кўрди», «сеп ёйди», «қуда чақирди», «куёв чақирди», «келин чақирди», «тоғора юбориш» ва ҳоказо ортиқча тадбирлар ўтказишга йўл қўйилмайди. Шунингдек, мотам билан боғлиқ «етти», «пайшанбалик», «якшанбалик», «йигирма», «қирқ», «ҳайит», «йил оши», «пул тарқатиш», «мато улашиш» маросимлари ҳам ўтказишга рухсат йўқ. Тўйларда икки нафардан ортиқ хонанда ёки гуруҳнинг хизмат кўрсатишига йўл қўйилмайди. Оилавий тадбирларда бошловчи, сўз устаси, фотосуратчи шартнома асосида хизмат кўрсатади.
Аввалроқ сенатор Мақсуда Ворисова «Тўй шартномаси» имзолашни жорий этиш ва тўйларни милиция назоратида ўтказишни таклиф қилганди.
Сенатор ва шоир Иқбол Мирзо республикамизда намунали ўтаётган тўйларни ўрнак тариқасида марказий телеканал орқали ярим соат, қирқ дақиқа давомида узатиб боришни таклиф қилди. Ҳуқуқшунос ва блогер Хушнудбек Худойбердиев тўй кортежида учта машина қатнашиши чекловига изоҳ сўради ва машиналар сони ундан кўпроқ бўлиши мумкинлигини мантиқан тушунтириб берди.Кузатувчиларнинг фикрича, бу қарор ҳаётга таъсир қилишига ишонч кам.
* * *
Телевидениеда илк бор ўзбек махсус хизматларнинг махфий операцияси ҳақидаги ҳужжатли фильм 13 сентябрь куни намойиш этилди. Фильмда ўзбек махсус хизматларининг Суриядаги уруш ўчоқларидаги қаровсиз ватандошларимиз — аёллар ва болаларни қайтариш операциясини амалга оширгани кўрсатилган. Қайтарилганларга ёрдам кўрсатиш, кундалик тинч ҳаётга қайтариш учун амалга оширилган ишлар ҳам фильмда бор.
Шу йилнинг 30 майида президент топшириғи асосида 156 нафар фуқаро, асосан болалар ва аёллар махсус авиарейс билан Дамашқдан Тошкентга олиб келинган эди. Кейинчалик 142 киши, жумладан, 47 нафар онага энг кам ойлик иш ҳақининг 10 баробари ва 95 нафар болага 5 баробари миқдорида моддий ёрдам кўрсатилган, уч нафар етим бола меҳрибонлик уйига, яна уч нафари эса «Кичкинтой» болалар уйига жойлаштирилган.
* * *
Катта-кичиклигидан қатъий назар камчиликни олиб чиқиб йўқотишга ҳаракат қилиш лозим. Шу нуқтаи назардан Навоийдаги мактабда полда ўтирган ўқувчилар мавзусини дайжестимизга қўшдик. Кимлардир учун бундан каттароқ муаммолар бордир, бироқ пойтахтда кўркам ва ажойиб президент мактаблари ташкил этилиши манзарасида Навоийда полда ўтирган ўқувчилар расми тарқалиши кўнгилли бўлмади. Telegram’даги @navoi_navoiy канали ёзишича, ўқувчилар 3 сентябрдан бери шу ҳолда дарс ўтмоқда. Аммо ҳокимлик ва халқ таълими бўлими ўқувчилар китобга келганда расм олинган деб чиқди.
Канал мутасаддиларга жавобни кечиктирмади. Болалар китоб олгани келган бўлса, нега ручка турганига, олдида китоб эмас, дафтар борлигига ва дам олиш куни форма кийиб китоб олгани бориши мантиққа зидлигига эътибор қаратди.
* * *
Терма жамоамизнинг Фаластинга ютқизиғи ортидан мураббий Эктор Купер истеъфога чиқарилиши маълум бўлди. Ҳозир терма жамоа бош мураббийи лавозими учун икки номзод кўриб чиқилмоқда: 2017 йилдан буён «Пахтакор»да ишлаётган Шота Арвеладзе ва ҳозирда «Бунёдкор»ни бошқараётган Вадим Абрамов.
Купер билан 2018 йилнинг 1 августидан 2021 йилнинг 30 ноябригача, ЖЧ-2022 саралаш цикли учун шартнома тузилганди ва агар терма жамоа Қатарда ўтказиладиган мундиалга йўлланма олса, шартнома автоматик тарзда турнир якунигача узайтирилиши кўзда тутилганди. «Kun.uz»нинг ёзишича, Эктор Купернинг йиллик маоши 2 миллион еврога яқин.
* * *
Қўқон шаҳрида Халқаро ҳунармандчилик фестивали очилди. Фестивалга ўнлаб мамлакатлардан юзлаб меҳмонлар ташриф буюрди.
Ҳунармандчиликнинг 34 йўналиши бўйича Ўзбекистондан 1116 нафар, 29 йўналиши бўйича 78 давлатдан 191 нафар ҳунарманд қатнашиши кутилган фестивалнинг очилиш маросимида Шавкат Мирзиёев иштирок этди. Шунингдек, президент фарғоналик зиёлилар билан гаплашди, халқ ичига кириб қутлади, Қўқон ва Марғилонни ривожлантириш бўйича кўрсатмалар берди.
Шунингдек, президент ташрифи мобайнида Қўқон эркин иқтисодий зонасида келажакда нархи 3 минг долларли арзон электромобиллар ишлаб чиқарилиши айтилди.
Фестивалда ғаройиб ҳунармандлик намуналари намойиш қилинди. Хиёбонда 50 метр узунликда кўза ва пиёланинг 3D расми ишланди. Сурхондарёликлар тиккан 25 метрли улкан сўзана ҳам келтириб илиб қўйилди.
Фестиваль очилиши катта мушакбозлик билан ҳамоҳанг бўлди. Ҳар хил рангли беш мингта мушак отилди. Қўқон бутунжаҳон ҳунармандлар шаҳарлари рўйхатига киритилди.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)