Наманганда «XXI асрда тиббиёт ва фармацевтикани ривожлантиришда инвестиция ва инновацияларнинг роли» мавзусига бағишланган халқаро форум бошланди. Бу ҳақда «Дарё» мухбири Азизбек Абдувалиев хабар бермоқда.
Форум вилоят ҳокимлиги, Соғлиқни сақлаш ва Инновацион ривожланиш вазирликлари ҳамда Фармацевтика тармоғини ривожлантириш агентлиги ҳамкорлигида ўтказилмоқда. Унда жаҳоннинг 30 дан ортиқ давлати, жумладан, Россия, Туркия, Жанубий Корея, Япония, Уммон, Германия, Буюк Британия, Франция, Италия, Ҳиндистон, Миср, Исроил, Сингапур, Малайзия, Озарбайжон, Қозоғистон, Беларусь, Болгария, Саудия Арабистони ва Украинадан 150 нафар олим, мутахассис ва компаниялар вакиллари иштирок этмоқда.
Форумни Бош вазир ўринбосари Азиз Абдуҳакимов табрик сўзи билан очиб берди. Соғлиқни сақлаш вазири Алишер Шодмонов, вилоят ҳокими Хайрулло Бозоровнинг чиқишлари бўлиб ўтмоқда.
Тадбир доирасида қатор давлатларнинг таниқли олимлари, сармоядорлари ва мутахассислари маърузалар билан чиқади. Эндокринология, кардиология, жарроҳлик, оналик ва болалик муҳофазаси ҳамда фармацевтика бўйича секция йиғилишлари ўтказилади.
Наманганда тиббиёт соҳасининг таниқли вакиллари иштирокида вилоят кўп тармоқли, болалар, перинатал ва кардиология марказлари ҳамда «Анамед» ва «Ойдин шифо» хусусий клиникаларида юқори технологик жарроҳлик амалиётлари ўтказилади.
Шунингдек, анжуман давомида Урал давлат тиббиёт университетининг Наманган давлат университетида ташкил этилган тиббиёт факультети очилиши, хорижий тадбиркорлар билан фармацевтикага оид қатор меморандумлар имзоланиши режалаштирилган.
Изоҳ (0)