Қашқадарёлик тез тиббий ёрдам ҳайдовчилари вилоят соғлиқни сақлаш бошқармасига қарашли махсус ва тез тиббий ёрдам автохўжалиги раҳбариятидан норози. Ҳайдовчиларнинг «Дарё»га шикоят қилишича, чақирувга чиққан автомобилларнинг ёнилғиси учун уларнинг ойлигидан ҳам ушлаб қолинади.
15 йилдан бери тез тиббий ёрдам тизимида ҳайдовчилик қилиб келаётган Улуғбек Файзуллаевнинг айтишича, вилоят соғлиқни сақлаш бошқармасига қарашли махсус ва тез тиббий ёрдам автохўжалиги раҳбарияти Hyundai автомобиллари учун АИ 91 маркали бензин бериши керак. Аммо улар АИ 80 маркали бензин беради.
— Ностандарт бензин беришгач, автомобилда ёнилғи сарфи ошиб кетади ва оқибатда кўп ёнилғи сарфлаймиз, — дейди Улуғбек Файзуллаев. — Масалан, бирор бир туманга чақирув билан кетадиган бўлсак, иссиқ об-ҳаво пайтида кондиционерни ёқамиз. Қолаверса, чақирувга шошган пайтларимиз машинани тез ҳайдаймиз. Стандарт ёнилғи қуйилмагани боис, бензин сарфи ошади. Оқибатда 10 литр бензин эмас, 15-20 литр бензин ишлатамиз. Ортиқча сарфланган ёнилғини «сотгансизлар», деб бизнинг ҳисобимиздан олиб қолишади.
Вилоят соғлиқни сақлаш бошқармасига қарашли махсус ва тез тиббий ёрдам автохўжалиги ҳисобчиси Муртазо Ғаффоровнинг тан олишича, ҳақиқатан ҳам ҳар ой ҳайдовчилар иш ҳақидан маълум бир миқдордаги маблағ ушлаб қолинади.
— Фақат путёвкага қўшимча бензин ёзиб келиб, бензин сарфини нотўғри кўрсатган ҳайдовчиларнинг ойлик иш ҳақидан ортиқча қилинган харажат ушлаб қолинади, — дейди Муртазо Ғаффоров. – Бошқа ортиқча, ноқонуний ушлаб қолишлар бўлмайди.
Аниқланишича, махсус ва тез тиббий ёрдам автохўжалиги вилоятдаги 6 та нефтбаза билан ҳамкорлик қилади. Раҳбариятнинг айтишича, автохўжаликда бензин маркасини танлаш имконияти йўқ.
— Вазирликдан вилоят соғлиқни сақлаш бошқармасига фонд ташлаб берилади ва ўша фонд маблағлари ҳисобидан буюртма қилинган ёнилғини тегишли нефтбазалардан оламиз, бизда бензин маркасини танлаш имконияти йўқ, — дейди автохўжалик мутасаддиси Ҳамза Қодиров. – Бу масалани ўзимиз ҳам вазирликка олиб чиқдик. Вазирликнинг айтишича, АИ 91 маркали бензинни биржадан харид қилишимиз керак экан. Бизда бундай имконият йўқ.
Автохўжалик бош муҳандиси Ҳамза Қодировнинг маълумот беришича, агар Hyundai автомобилларига ҳақиқатан ҳам АИ 91 маркали бензин мўлжалланган бўлсаю, АИ 80 бензин солинса, ёқилғи сарфи кўпаяди.
Ҳайдовчиларнинг шикоят қилишича, автомобилнинг бензин баки муҳрлансада, ҳайдовчиларни ҳисоби чиқамаётган бензинни сотишда айблашади.
Ҳайдовчи Жамол Қудратовнинг маълум қилишича, ҳар ой маошидан 130-200 минг сўм миқдорида пул ушлаб қолинади. Сабаб сифатида кўп ёнилғи сарфлагани айтилади.
— Бензин қуйиб беришгач, бакни, албатта, муҳрлашади, аммо яна «бензин сотгансизлар», деб ойлигимиздан 200 минг сўмгача ушлаб қолинади, - дейди Жамол Қудратов. – Тушунтирсакда, эшитишни хоҳлашмайди.
Damas ҳайдовчиси Одил Олтиев эса автокорхона раҳбарияти нафақат бензин, ҳатто автомобиль эҳтиёт қисмлари учун ҳам ҳайдовчиларга «жарима» солишини маълум қилмоқда.
— Автомобилга шина сотиб олиш учун ҳам биздан пул сўрашади, - дейди Одил Олтиев. — Бир машинани 4 нафар ҳайдовчи ҳайдашини ҳисобга олсак, ҳар бир ҳайдовчидан алоҳида тартибда баллонга деб пул олинади.
Тез тиббий ёрдам ҳайдовчиларининг қўшимча қилишича, автохўжалик раҳбарияти кундалик харажатлар — мой ва филтр алмаштириш, шина яматиш каби харажатларни ҳам ҳайдовчилар зиммасига юклайди.
Автохўжалик раҳбарияти эса бу иддаоларни тамоман рад этмоқда.
— Тез тиббий ёрдам автомобилларининг мойи ҳамда филтрини алмаштириш ҳайдовчиларга қолмаган, — дейди Муртазо Ғаффоров. – Бунинг учун махсус хизмат бор. Сервисларимиз ишлаб турибди. Фақат бунинг учун ҳайдовчи ҳафсала қилиб, сервисга бориши ва ҳақини талаб қилиши керак.
«Дарё» таҳририяти ушбу масалага мутасадди раҳбарлар эътибор қаратиб, тез тиббий ёрдам ҳайдовчиларини қийнаб келаётган муаммоларга ечим топилишида ташаббус кўрсатишларини сўраб қолади.
Изоҳ (0)