Ўзбекистон миллий терма жамоаси 5 сентябрь, пайшанба куни ЖЧ–2022 2-саралаш босқичи 1-тури доирасида Фаластин термаси майдонига сафар қилиб, 2 та тўп фарқи билан рақибга имкониятни бой берди.
Ўйиндан кейинги матбуот анжуманида терма жамоа устози Эктор Купер қуйидагича фикр билдирди:
«Ўйинчиларим намойиш этган ўйиндан асло кўнглим тўлмади. Биринчи голни ўтказиб юборгунга қадар ёмон ўйнамаётган эдик. Лекин голдан кейин нима бўлганини рости тушунмадим. Биз диққат-эътиборни ва тартибни унутдик. Ҳимояда қатор қўпол хатоларга йўл қўйдик. Вазиятни ўнглаш мақсадида майдонга янги кучларни туширдик. Аммо якунда бу бизга наф келтирмади.Шуни айтишим жоизки, биз эндигина саралаш баҳсларини бошладик. Олдинда ўйинлар ҳали кўп. Бугунги учрашувдан тўғри хулоса қилган ҳолда, келаси ўйинларда ғалаба қозонишга уринамиз.
Саралашда энди биттагина ўйин ўтказдик, холос. Битта ўйиндан кейин истеъфо ҳақида гапириш жуда ҳам ноўрин, деб ҳисоблайман.
Фаластин терма жамоасини қўлга киритилган ғалаба билан табриклайман. Рақиб бугун яхши ўйнади. Кейинги босқичга йўл олиш учун барчада имконият мавжуд.
Саралашни ғалаба билан бошлаш жуда муҳим эди. Лекин афсуски ундай бўлмади. Яна бир бор таъкидлайман, биргина мағлубиятдан фожиа ясаш тўғри эмас. Ҳали олдинда ўйинлар кўп ва қолган ўйинларда максимал очколарни тўплашга ҳаракат қиламиз», – дейди Купер.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)