Август ойининг бошида Қашқадарё вилояти, Миришкор туманидаги 3 нафар аёл туғруқ вақтида вафот этгани тўғрисида хабар берилган эди. Соғлиқни сақлаш вазирлиги томонидан ушбу хабар юзасидан ҳудудда хизмат текшируви ўтказилди.
Миришкор тумани Жейнов қишлоғида истиқомат қилувчи фуқаро Нодира Абдуллаева 2018 йил 3 октябрда ҳомиладорликнинг 10-ҳафтаси ва 4-ҳомиладорлик билан ҳудуддаги Жейнов участка шифохонасида рўйхатга олинган. 2018 йил 19 декабрдан камқонликнинг енгил даражаси билан ҳисобда турган. Ҳомиладорликнинг индивидуал картаси бўйича эса Нодира Абдуллаева гинеколог Н.Раҳимова назоратида бўлган. Дастлабки скрининг кўригида унга ҳомила тушиш хавфи билан ташхис қўйилган. Шундан сўнг Нодира Абдуллаева доимий гинеколог назоратида бўлган ва унга зарур дори воситалари буюрилган.
Апрель ойида аёл патология бўлимида енгил преэклампсия ташхиси билан даволаниб чиққан. Муолажа жараёнида операцияга кўрсатма бўлмаган, аҳволи яхшилангандан сўнг уйига рухсат берилган. Ҳомиладор аёл ой-куни яқинлашгани ва фаол туғруқ жараёни бошланмаётгани сабаб 24 апрель куни яна шифохонага кўрикка келганида унга туғруқ жараёни тушунтирилган ҳамда ётиб даволанишга тавсия берилган. Аммо аёл бунга рози бўлмаган.
Эртаси куни унда туғруқ дарди бошланган ва тез ёрдам чақирилган. Тез ёрдам машинаси олти дақиқада чақирув жойига етиб келган ва Жейнов участка шифохонаси акушер-гинекологи Н.Раҳимова, ҳамшира Х.Аннамуродова ҳамда фелдшер З.Муродовалар аёлни тўлиқ кўрикдан ўтказган ва қон босимини ўлчаган. Ҳомиладорнинг аҳволи оғирлиги сабаб Миришкор туман тиббиёт бирлашмаси туғруқ бўлимига ётқизилган. Шифокорлар томонидан зудлик билан ултратовуш текширувидан ўтказилганда ҳомиланинг ўлим ҳолати аниқланади.
Тиббий хулосалар натижасига кўра, уй шароитида туғруқ фаолияти бошланган, лекин туғруқ муассасасига ўз вақтида мурожаат қилмаганлиги натижасида Н.Абдуллаевада бачадон ёрилиши ҳолати кузатилган. Туғруқхона мутасаддиларининг тиббий ёрдам кўрсатишига қарамай, беморни шок ҳолатидан чиқариш имконияти бўлмаган. Ўтказилган реанимацион чора-тадбирлар ижобий самара бермаган.
Соғлиқни сақлаш вазирлиги томонидан тузилган хизмат текшируви натижасига кўра, ҳомиладор аёл Н.Абдуллаева амбулатор шароитда етарлича текширувдан ўтказилмаган, тиббий ёрдам кўрсатилиши тўлиқ ташкиллаштирилмагани аниқланди.
Бундан ташқари, хизмат текшируви жараёнида яна бир миришкорлик аёл Дилафрўз Бекмуродова билан рўй берган ҳолат ҳам ўрганилди.
Маълум бўлишича, Дилафрўз Бекмуродова 1989 йилда туғилган бўлиб, Булуч қишлоғида истиқомат қилган. Ўтган йилнинг 27 ноябрида 2-ҳомиладорликнинг 9-ҳафтаси билан Жейнов участка шифохонасида рўйхатга олинган. Аёл ҳудуд акушер-гинекологи Назокат Раҳимованинг мунтазам кўригида бўлган, патронаж ҳамшира томонидан уйда кузатувлар олиб борилган. Ҳомиладор аёл ҳисобга олинганда УТТ, скрининг текширувларидан ўтган, турли юқумли касалликлар бўйича текширувлар амалга оширилган.
Ой-куни яқинлашгунга қадар ҳомила ва ҳомиладор аёл учун хавф омиллари кузатилмаган. Жорий йилнинг 10 июнь куни соат 10:00 атрофида Дилафрўз Бекмуродовада тўлғоқ бошланган. Уни Жейнов участка шифохонаси туғруқ бўлимига шу куни соат 12:00 да олиб келишган. Бу ердан соат 17:20 лар атрофида туман туғруқ бўлимига тез ёрдам машинасида жўнатилган. Аёл 17:40 дан 21:20 га қадар шифокорлар кузатувида бўлган. Шу вақтда унинг аҳволи бирданига оғирлашиб, кўкрак соҳасида оғриқ, мушаклар тонуси ошиши, ҳаво етишмаслик ҳолатлари билан зудликда сунъий нафас олиш мосламасига уланган. Мутахассислар томонидан реанимацион даво-муолажалари ўтказилишига қарамасдан биологик ўлим қайд этилган.
Яна бир фуқаро, 21 ёшли Алиса Холхўжаева Миришкор тумани, Чандир қишлоғида туғилган. А.Холхўжаева жорий йил 20 июнь куни соат 20:30 да Миришкор туман тиббиёт бирлашмасига биринчи ҳомиладорликнинг 38-ҳафтасида оғир преэклампсия, йўлдош кўчиши, ҳомиланинг антенал ўлим ҳолати ҳамда камқонликнинг ўрта оғир даражаси ташхиси билан туғруқхона бўлимига қабул қилинган.
Дастлаб у келганида бел ва қов соҳасида кучли оғриқ, бош оғриғи, қиндан қонли ажралма келиши билан шикоят қилган. Туман тиббиёт бирлашмаси мутахассислари томонидан тиббий кўрикдан ўтказилганда ҳомилада юрак уриши аниқланмаган. Тегишли кўрсатмаларга кўра, унда кесарча кесиш амалиёти қўлланилган ва вазни 2780 грамм ўғил бола жинсли ўлик ҳомила олинган.
Шифокорлар томонидан амалиёт асоратсиз ўтган, йўқотилган қон ўрнини қоплаш чоралари кўрилган. Шундан сўнг аёлнинг аҳволи оғирлиги сабабли туғруқхонанинг жонлантириш бўлимига ётқизилган. Бемор жарроҳлик амалиётидан кейин 9 кун давомида жонлантириш бўлимида даволанган. Аммо кўп қон йўқотилиши ва амалиётдан кейинги ҳолат бўйича беморда ўткир буйрак етишмовчилиги ташхиси қўйилган. Вилоят марказидан чақирилган гемодиализ мутахассиси тавсиялари тайинланган.
Реанимация бўлимида ўтказилган интенсив реанимацион даво муолажаларига қарамасдан, беморнинг аҳволи оғирлашиб борган ва 29 июнь куни соат тонгги 3:00 да жони узилган. Бемор яқинларининг қаршилиги сабабли аёлда патологоанатомик текширув ўтказилмаган, натижада ўлим сабаби номаълумлигича қолган.
Соғлиқни сақлаш вазирлиги томонидан юқорида қайд этилган ўлим ҳолатлари юзасидан Миришкор туман тиббиёт бирлашмаси масъул ходимларига нисбатан интизомий чоралар қўлланилди. 3 нафар масъул ходим – Миришкор туман тиббиёт бирлашмасининг даволаш ишлари бўйича ўринбосари Х.Усманов, ТТБ бошлиғининг оналик ва болаликни муҳофаза қилиш масалалари бўйича ўринбосари Х.Чориев, ТТБ бош акушер-гинекологи Ж.Камолов эгаллаб турган лавозимидан озод этилди. Шунингдек, 3 нафар тиббиёт ходимининг бир ойлик маошидан 30 фоиз миқдорида жарима чегириб қолинди.
Изоҳ (0)