«Дарё» сайтида ҳафтанинг энг муҳим ва муҳокамали хабарлари шарҳини бошлаймиз.
Қаторасида икки ҳафтадан бери кўтарилаётган долларнинг йўли тўсилиб пасайишга мажбурланди. 9450 сўмлик маррани босиб ўтган доллар жаноблари Ўзбекистон банклари нақд долларни сотишни бошлагач секин суръатларда қулай бошлади. 23 август куни доллар 9366 сўм бўлди. Банклар нақд валюта сота бошлагач, фуқаролар кўрпанинг қатига босган пулларини сумкаларга солиб банкдан доллар харид қилишга тутинди. Ўзбекистонликлар бир куннинг ўзида 15 миллион доллар сотиб олди.
Миллий валютамиз қадрсизланиши манзарасида ижтимоий тармоқларда сўм деноминация қилиниши, яъни 10 минг сўмни бир сўмга тенглаш орқали қиймати ўзгартирилиши ҳақида ёлғон хабар тарқалди. Ўзбекистон ҳаётида катта ўзгариш ясаши мумкин бўлган бу сохта хабарга ишонувчилар пайдо бўлгач, Марказий Банк раиси Мамаризо Нурмуродов сўм қиймати ўзгартирилмаслигини маълум қилди.
* * *
Ҳар йилгидан бошқача ўтган тест синовлари бу ҳафта тугади ва якуний натижалар эълон қилинди. Натижани билиш анча осонлашган. Уни абитуриентнинг шахсий кабинети, SMS хабарнома хизмати (5100 қисқа рақамига абитуриент ID рақамини юбориш) ва тест натижалари қайдномаси (олий таълим муассасаларига борган ҳолда) орқали билиш мумкин. 21 августдан эса тест синовлари юзасидан апелляция бериш бошланган эди.
* * *
21 август куни ўқувчиларимиз соғлиқни сақлаш ходимларига нисбатан хунук муносабатнинг гувоҳи бўлди. Андижондаги шифохонада даволанаётган бемор аёлнинг ўғли бўлим шифокори билан тортишиб қолиб, уни бўға бошлаган ва, ҳушини йўқотгач, хонада қўл-оёғини боғлаб, устига бензин сепган. Жабрдийда унинг мақсадини сезиб, одамларни ёрдамга чақирган. Беморлар ва тиббий ходимлар қулф эшикни синдириб киргач, зўравон бензинни одамларга ҳам сепишга улгурган. Аммо у кўплашиб зарарсизлантирилган ва ўт ёқишига имкон бермасдан олиб чиқиб кетилган. Кўп ўтмай унга қарши жиноий иш очилди.
Соғлиқни сақлаш вазирлиги Андижонда шифокорга қилинган суиқасдга тиббиётчиларнинг ҳақ-ҳуқуқларини сақлаш учун қатъий ҳуқуқий чоралар кўрилиши орқали жавоб берилишини маълум қилди.
* * *
Ўзбекистон миллий телерадиокомпаниясининг «Маҳалла» телеканали биноси ёниб кетди. Ёнғин телеканал биносига кираверишдаги ошхонадан бошланиб, бинонинг охиригача давом этган. Ёнғин электр симларининг қисқа туташуви оқибатида содир бўлган, деб тахмин қилинди. Тан жароҳати олганлар йўқ. Ёзишларича, телеканал биноси ўзининг ўт ўчириш ва қўриқлаш хизматларига эгадир.
* * *
23 август куни Ўзбекистон Олий Мажлиси Сенатининг XXI ялпи мажлиси иш бошлади ва унда «Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида»ги; «Хотин-қизларни тазйиқлар ва зўравонликдан ҳимоя қилиш тўғрисида»ги; «Атом энергиясидан тинчлик мақсадларида фойдаланиш тўғрисида»ги ва бошқа долзарб қонун лойиҳалари кўриб чиқилди. Эътиборлиси шундаки, Сенат тарихида илк марта ялпи мажлис очилиши ижтимоий тармоқда жонли эфирда узатилди.
Бундан аввалроқ Сенат раиси Танзила Норбоева бир гуруҳ журналист ва блогерларни Сенат биносига чақириб, улар билан учрашув ташкил қилган ҳамда уларнинг таклифларини эшитган эди.
* * *
Олий Мажлис Сенати раисининг биринчи ўринбосари Содиқ Сафоев мамлакатимизда 25 йил амал қилиб келган тараққиётнинг ўзбекча моделини шубҳага олди. Парламент юқори палатасининг XXI ялпи мажлисида ҳудудларга инвестицияларни жалб этиш мавзусида маъруза қилган жаноб Сафоевнинг нутқидаги асосий фикрларни келтирамиз:
«...Ўзбекистон киши бошига тушадиган ялпи маҳсулот улуши бўйича дунёнинг иккинчи юзталигидаги давлатлар орасидан ўрин топди... Ўзбекистон! Буюк тарихга, дунёдаги энг меҳнаткаш аҳолига эга Ўзбекистон бир юз... йигирма нечанчи ҳам ўринда. Ҳеч тушуниб бўлмайди!
Бунинг сабаби битта – вақтида ислоҳотлар ўтказилмаган. Шунинг натижасида бизда ишчи кучимизнинг учдан бири – қишлоқ хўжалигида. Бу – қолоқликнинг биринчи кўрсаткичларидан бири.
Миллионлаб ҳамюртларимиз четда иш қидириб юришга мажбур бўлди...»
«...Очиғини айтайлик, буни ҳаммамиз тушунишимиз керак, уч йил олдин президентимиз жасорат билан мамлакат ривожида бурилиш ясамаганида, бизнинг жамиятимиз, иқтисодиётимиз ҳалокат ёқасига бориб қолган эди.
Бугун иқтисодий сиёсатимизга чуқур ва пухта ўйланган довюраклик... Кўп йиллар биз аста-секин, ўзбек модели... деб юрдик. Бу – нотўғри бўлган сиёсат. Мана бугун бу тўғриланмоқда...»
Содиқ Сафоев, шунингдек, ҳозиргидек инвесторларни жалб қилиш сиёсатини ҳам тилга олиб: «...Сармоядорларга биринчи навбатда қонуний кафолат керак. Биз уларга берган ошимиз, кийдирган тўнларимиз зое. Уларга бу нарса керак эмас. Уларга аниқ қонун ва имкониятлар керак. Шуни тушунишимиз керак...», деб айтди.
* * *
Аслида саноқли нашрлар ёритган бу воқеани дайжестимизга қўшишга бир оз ўйландик. Ахийри ижтимоий тармоқнинг кўп сонли фойдаланувчилари томонидан қайта-қайта муҳокама қилинган воқеани ҳафтаномага қўшишга қарор қилдик. 23 август куни Жамолиддин Муҳаммаджон исмли блогерни махсус ходимлар маҳкамага олиб бориб соқолини қиришга мажбурлагани ҳақида хабарлар тарқалди. Блогернинг ўзи Ички ишлар Бош бошқармасига мурожаат қилганини билдирди. Аслида соқол қўйиш барчанинг шахсий иши бўлиб, «Дарё» кўп бора соқол ўстириш бўйича тавсиялар берганини айтиб ўтамиз. Фуқаронинг соқол қўйишига орган ходимлари аралашиши (хизмат талаби билан соқол тақиқланган ҳолатлар мустасно) худди телесериални давлат мансабдорининг хоҳиш-иродаси билан тўхтатилишига ўхшаб, ҳуқуқий давлатга мос келмайдиган ҳолатдир.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)