Норматив-ҳуқуқий ҳужжатлар лойиҳалари порталига Ички ишлар вазирлиги томонидан «Ўзбекистон Республикаси фуқаролари, чет эл фуқаролари ва фуқаролиги бўлмаган шахсларни Тошкент шаҳри ва Тошкент вилоятида доимий ва вақтинча прописка қилиш тартибини янада соддалаштириш тўғрисида»ги Вазирлар Маҳкамаси қарори лойиҳаси жойлаштирилди.
Хушнуд Худойбердиевга кўра, гарчи қарор лойиҳаси номи «прописка қилиш тартибини янада соддалаштириш» деб номланган бўлса ҳам, лекин аслида пропискага оид ҳозирги мавжуд тартибнинг кўчирмаси бўлган холос. Халқ учун айрим кичик ҳолатларни ҳисобга олмаганда, бирорта айтишга арзигулик енгиллик берилмаяпти. Шунчаки пропискага оид бир нечта қарор ва йўриқномалар биттада бирлаштирилган.
Аксинча, қарор лойиҳасига қараса, айрим бандлар ҳозиргидан оғирлаштирилмоқда. Масалан, бугунги кунгача 2-банд билан пропискага кириб, 3 йилдан кейин уй сотиб олганлар аризасига асосан 1-бандга ўтиши мумкин эди.
Таклиф этилаётган лойиҳада мана шу ҳуқуқ олиб ташланмоқда. Ўзи 2-банд бошиданоқ бу рўйхатда йўқ эди, 2018 йил 13 августдаги ўзгаришлар билан қўшилганди. Аммо 1 йил ўтар-ўтмас, ушбу енгилликни яна қайтариб олиб қўйишмоқчи.
Лойиҳада бевосита жараён билан боғлиқ айрим янгиликлар ҳам йўқ эмас. Масалан, доимий ёки вақтинчалик пропискага ҳужжатларни Тошкентдаги исталган паспорт столга (айнан ўша туман бўлиш шарт эмас) ёхуд Давлат хизматлари марказига топшириш мумкин бўлади.
Қарор лойиҳаси бўйича 25 августга қадар таклифлар бериш мумкин.
Изоҳ (0)