Ҳашаматли автомобиллар, курортлар, темир йўл: Атамбаевнинг мол-мулки хатланди

Қирғизистон Бош прокуратураси собиқ президент Алмазбек Атамбаевнинг хатланиши керак бўлган мол-мулки рўйхатини эълон қилди, деб ёзади Tengrinews.

Фигуранти Атамбаев бўлган жиноят ишларини текшириш доирасида мол-мулк, қимматбаҳо қоғозлар, акциялар, Қирғизистон банкларидаги барча ҳисобрақамлар хатга олинган. Чунончи 25 та банкдаги ҳисоблар ҳамда 10 та банкда банк ячейкалари таркиби хатланган.

Алмазбек Атамбаевнинг бешта автомобили, Чуй ва Иссиқкўл вилоятларидаги ер участкалари, Қўй-Тош қишлоғидаги яйлов, саломатлик маркази, турар жой, кўп йиллик дарахтзорлар, шунингдек, собиқ президентнинг рафиқасига тегишли мол-мулк: учта автомобиль, Бишкекдаги квартира ва турар жой хатланган.

Бундан ташқари, «Қирғизавтомаш» ОАЖ мол-мулки бўлган 10 дан ортиқ цех, 20 дан зиёд хонадон, нотурар бинолар, темир йўл, дўконлар, ер участкалари, омборхоналар ва бошқалар ҳам хатга олинган.

Шунингдек, «Медиа Форум» ОАЖ, «Форум» илмий-ишлаб чиқариш фирмаси, «Апрель-ТВ»» мол-мулки ҳам хатланган.