Президент Шавкат Мирзиёевнинг 19-сон ихтисослаштирилган «Жаслиқ» колониясини тугатиш тўғрисидаги қарорига қатор давлатлар ва халқаро ташкилотларнинг тезкор муносабати Ўзбекистонда эътироф этилмоқда. Ўзбекистон Ташқи ишлар вазирлигининг қайд этишича, қатор халқаро ташкилотлар, давлат тузилмалари, сиёсий доираларнинг расмий вакиллари, ОАВ мазкур ҳужжатнинг инсон ҳуқуқларини ҳимоя қилишда ва унинг қадр-қимматини ҳурмат қилишдаги аҳамиятини таъкидламоқда.
АҚШ давлат котибининг Жанубий ва Марказий Осиё масалалари бўйича ёрдамчиси вазифасини бажарувчи Элис Уэллс Twitter’даги аккаунтида қуйидагиларни ёзиб қолдирди: «Биз Ўзбекистоннинг ёмон ном чиқарган ‘Жаслиқ’ қамоқхонасини ёпиш тўғрисидаги эълонини қўллаб-қувватлаймиз. Ўзбекистонда инсон ҳуқуқларини яхшилаш учун ҳали олдинда кўп ишлар турибди, бироқ ушбу зулм масканининг тугатилиши ислоҳотлар йўлидаги муҳим қадам ҳисобланади».
АҚШ Давлат департаментининг Инсон ҳуқуқлари, демократия ва меҳнат бюроси қуйидагича муносабат билдирди: «Биз ‘Жаслиқ’ қамоқхонасини ёпиш тўғрисида эълон қилгани учун Ўзбекистондан миннатдормиз. Инсон ҳуқуқлари жамиятлари бу тўғрисида деярли сўнгги 20 йил давомида сўраб келаётган эди».
БМТнинг Ўзбекистондаги координатори Ҳелена Фрейзер ҳам Президент Шавкат Мирзиёевнинг қарорини қўллаб-қувватлади: «Мазкур жараён доирасида БМТ инсон ҳуқуқлари тамойиллари ва БМТнинг жиноятчиликнинг олдини олиш ва одил судлов соҳасидаги стандартлар ва нормалардан келиб чиққан ҳолда Ўзбекистонга ўзининг пенитенсиар тизимини ислоҳ қилишда ва қамоққа олиш билан бўглиқ бўлмаган санкциялар ва чораларни қўллашда бундан кейин кўмаклашишга тайёр».
Европа Иттифоқининг «Жаслиқ» жазони ўташ колонияси ёпилиши бўйича баёнотида қуйидагилар қайд этилган: «2017—2021 йилларга мўлжалланган Ўзбекистоннинг бешта устувор йўналиши бўйича Ҳаракатлар стратегиясида кўрсатилганидек, ҳуқуқ устуворлиги ва инсон ҳуқуқларига амал қилиниши Ўзбекистон иқтисодий ва ижтимоий тараққиётини жадаллаштиришнинг узвий шарти ҳисобланади. Ҳам хорижий, ҳам ички иқтисодий операторларнинг олиб борилаётган ислоҳотларга ишончи ва уларнинг Ўзбекистон иқтисодиётига инвестиция китиришга тайёрлиги даражаси мазкур соҳадаги доимий ўсишга боғлиқ. Европа Иттифоқи муносабатларимизни келажакда янги даражага кўтарувчи воқеаларни қўллаб-қувватлашга тайёр».
«Ўзбекистон давлатимиз раҳбари томонидан амалга оширилаётган мамлакат ҳаётининг барча жабҳаларидаги ўзгаришларнинг асосий қисми ҳисобланувчи инсон ҳуқуқларини ҳимоя қилиш ва таъминлаш соҳасидаги изчил ислоҳотларнинг халқаро ҳамжамият томонидан тан олинишини ва қўллаб-қувватланиши юқори баҳолайди ва мазкур йўналишда халқаро, ҳукумат ва ноҳукумат ташкилотлар билан ҳамкорликни давом эттиришга содиқлигини тасдиқлайди», — дейилади Ўзбекистон Ташқи ишлар вазирлигининг шарҳида.
Изоҳ (0)