АҚШ Адлия вазирлиги томонидан берилган маълумотга кўра, Нью-Йоркда истиқомат қилган 28 ёшли Ўзбекистон фуқароси Азизжон Раҳматов 2016 йил 11 май куни ҳибсга олинган. Суд ҳужжатларига кўра, у Сурияда ИШИД томонида туриб жанг қилиш истагида бўлган кўнгиллиларни молиялаштириш билан шуғулланган, деб хабар беради «NUZ.uz».
Эслатиб ўтамиз, 2016 йили ИШИДга алоқадорликда айбланган бир неча Ўзбекистон ва Қозоғистон фуқаролари қўлга олинган эди. Улар орасида Бруклинда истиқомат қилувчи Абдурасул Жўрабоев ҳам бор.
Кейинроқ, терговга маълум бўлишича, Жўрабоев Қозоғистон фуқароси Аҳрор Саидаҳмедов билан Туркияга, ундан Сурияга ўтиб, ИШИД таркибида жанг қилишни режалаштирган.
Раҳматов ҳамда унинг ҳамтовоқлари — Аброр Ҳабибов, Дилҳаёт Қосимов ва Акмал Зокиров Саидаҳмедовнинг фаолиятини молиялаштириш билан шуғулланган. Жўрабоев август ойида ўз айбини тан олган.
Орадан уч йил ўтиб, тергов ва ҳибсда сақланган Азизжон Раҳматов айбини бўйнига олиб, ИШИД террорчилик ташкилотига молиявий томондан ёрдам кўрсатганини тан олган.
Раҳматовнинг айтишича, у Саидаҳмедовнинг олдига бориш учун бошқалардан ҳам пул йиғган. Бу пулларни у Сурияга учишидан олдин Акмал Зокировнинг ҳисобига ўтказган. Зокиров бу пулларни Саидаҳмедовга бериши керак бўлган.
Аввалроқ, суд ҳукмига кўра, Жўрабоев ва Саидаҳмедовнинг ҳар бири 15 йилга озодликдан маҳрум этилган эди.
Ҳабибов ва Зокиров ҳозирда суд ҳукмини кутмоқда.
Агарда Азизжон Раҳматов айбдор деб топиладиган бўлса, 15 йилгача озодликдан маҳрум этилиши мумкин.
Изоҳ (0)