«Дарё» сайтида ҳафтанинг энг муҳим ва муҳокамали хабарлари шарҳини бошлаймиз.
Шавкат Мирзиёев 5 августдан қисқа муддатли меҳнат таътилига чиқди. Давлат раҳбарининг таътили Ўзбекистон ҳудудида ўтказилиши режалаштирилган. Бу мустақил давлатчилигимиз тарихида ўзига хос ҳодиса деб эътироф этилишининг сабаби шуки, 28 йил давомида президент меҳнат таътилига чиққани ҳали кузатилмаганди. Агар Шавкат Мирзиёевнинг бош вазирликда ишлаган йилларини ҳам қўшсак, у ўн етти йилда энди дам олаётгани аён бўлади.
Арафа куни Саида Мирзиёева ота-онасининг оилавий дам олаётган фотосуратини чоп этди.
* * *
Ахборот ва оммавий коммуникациялар агентлиги раҳбари Комил Алламжонов Alter Ego дастурига берган интервьюсида Шавкат Мирзиёевнинг иш куни ҳақида сўзлаб берди. Айтиш лозимки, бу интервью президентнинг бизга номаълум бўлган иш тартиби ҳақида билиш имконини берди. Интервьюни дайжестимизга қўшганимиз сабаби ҳам шу.
Алламжоновнинг айтишича, иш куни соат 9–9:30 ларда бошланади ва қарийб 24:00 гача давом этади. Кўпчилик чарчайди, аммо Шавкат Мирзиёев ғайратини сақлаб қолади. Президент мобил телефондан фойдаланиб туради. Алламжоновнинг айтишича, президентни танқид қилиш учун сабаб йўқ, аммо бунинг учун барча ҳуқуқ ва имконлар етарли. Шунингдек, у сайтларни тўсиш бефойда иш эканлигини ҳам таъкидлади.
* * *
Наманган вилоятидаги битирилиши бир неча марта ортга сурилган Тўрақўрғон иссиқлик электр станциясининг биринчи газ турбинаси ишга тушди. Ҳозирча ИЭС тест режимида ишлайди, ноябрдан тўлақонли фаолият кўрсатади. Тўрақўрғон ИЭС йилига 7 миллиард кВт/соат электр энергиясини ишлаб чиқаришга мўлжалланган. ИЭС Наманган, Андижон ва Фарғона вилоятларининг электр қувватига бўлган асосий эҳтиёжини қоплаши керак.
ИЭС Япониянинг Mitsubishi Corporation ва Mitsubishi Hitachi Power Systems Ltd. концорциуми билан ҳамкорликда бунёд этилди.
* * *
Инсон ҳуқуқлари бўйича Ўзбекистон миллий маркази раҳбари Акмал Саидов 6 август куни журналистлар билан ўтказган очиқ мулоқотида давлат бошқаруви, инсон ҳуқуқлари, қамоқхоналарга оид кўпгина масалаларга ойдинлик киритди. Саидов уйлар бузилиши машмашаларига тўхталар экан, «Хусусий уй муқаддас, суд қарорисиз бузилиши мумкин эмас», деб айтди. Пулли мактаблар борасида эса «Мактабларни пулли қилиш — Конституцияни бузиш», деди. Ўзбекистоннинг бош инсон ҳуқуқлари ҳимоячиси ўтган ҳафта ёпилган «Жаслиқ» қамоқхонасида маҳбусларга нисбатан қийноқ қўллангани эҳтимолини истисно қилмади. «Мен ‘Жаслиқ’да қийноқлар бўлмаган деб айта олмайман», деди Саидов. Айтиб ўтиш лозимки, кўп йиллар давомида халқаро ташкилотларнинг Жаслиқ қамоғини танқид қилишига Акмал Саидов жавоб қайтариб келган.
* * *
6 август куни кечки пайт пойтахтимизнинг Дархон мавзеида бир нечта автомобиль иштирокида аянчли автоҳалокат содир бўлди. «Gazeta.uz» ёзишича, камида уч киши қаттиқ жароҳат олиб, Республика шошилинч тиббий ёрдам илмий марказига олиб келинган. Айтишларига қараганда, қурбонлар йўқ. Nissan GT-R35 суперкарининг 33 яшар ҳайдовчиси бошқарувни йўқотиб, икки машина билан тўқнашув содир этган. Айрим хабарларга кўра, қимматбаҳо машина рулида унинг эгаси эмас, қариндоши бўлган. Автоҳалокат сабабчисини аниқлаш ишлари кетяпти.
* * *
Ўтган ҳафтадаги видеоселекторда Шавкат Мирзиёев жамиятда жиддий норозилик кайфиятларига сабаб бўлган ва Ўзбекистонни бутун дунёга шарманда қилаётган вилоят раҳбарларига чора кўришни бош вазир Абдулла Арипов ва Президент администрацияси раҳбари Зайнилобиддин Низомиддиновга топширган эди. Аммо кетиши тахмин қилинган Қашқадарё, Фарғона ва Хоразм вилоятлари ҳокимлари йил охиригача лавозимини сақлаб қолди.
Президент администрацияси ва Вазирлар Маҳкамаси уларни бўшатиб юбориш «вазиятдан чиқишнинг энг осон йўли», ҳокимлар бунинг ўрнига йўл қўйган хатоларини тузатишда шахсан иштирок этиши мақсадга мувофиқроқ деб ҳисоблайди.
* * *
Ҳафта охирида доллар яна сакрай бошлади. Марказий банк хабарига кўра, 1 АҚШ доллари душанба куни эълон қилинган курсга нисбатан 177,13 сўмга кўтарилган ва 1 доллар 8882,00 сўмга етган. Бу илк бор расмий курс 8700 сўмлик нуқтадан ошишидан сўнг навбатдаги кескин кўтарилиш бўлди.
Таниқли молиявий таҳлилчи Юлий Юсупов Ўзбекистонда доллар курси ўсиши қачонгача давом этиши ҳақидаги мақоласи «Дарё» сайтида чоп этилди.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)