Соғлиқни сақлаш вазирлиги электрон нашрларда эълон қилинган Самарқандда қизамиқ тарқалаётгани ҳақидаги хабарларга муносабат билдирди.
Вазирлик матбуот хизматига кўра, 2019 йил январдан 5 августгача бўлган муддатда Самарқанд вилоятида 419 та ҳолатда қизамиққа гумон қилинган бўлиб, улардан 29 нафарида касаллик тасдиқланган. ЖССТ мамлакатга қизамиқ вируси бошқа давлатлардан кириб келганлигини тасдиқлади. 2018 йилда республика бўйича қўшимча профилактик ва эпидемияга қарши чора-тадбирлар натижасида 22310 киши қизамиқ касаллигига қарши эмланди.
Самарқанд вилоятида касалликни келиб чиқишининг асосий сабаби ҳам қизамиққа қарши эмланмаган чет эллик фуқаролар бўлган. Аҳоли орасида ушбу касалликни тарқалишининг олдини олиш ва тўхтатиш мақсадида улар билан мулоқотда бўлган 11101 нафар шахс эмланган. Ўлим ҳолатлари қайд этилмаган.
Таъкидлаш жоизки, Ўзбекистонга 2017 ва 2018 йилларда ЖССТнинг «Қизамиқ ва қизилча касаллигининг элиминацияси» , яъни, ушбу касалликларнинг маҳаллий тарзда тарқалишининг тўхтатилганлиги тўғрисида халқаро сертификати берилган. Унга мувофиқ, мамлакат учун индикатор кўрсаткичи 100000 нафар аҳоли сонига нисбатан 2 та ҳолатда касаллик тасдиқланиб, рўйхатга олиниши мумкин. Ҳозирда Ўзбекистонда бундай ҳолат кузатилмаяпти. Қолаверса, айни пайтда элиминацияни, яъни қизамиқ тарқалишининг тўхтатилганлик ҳолатини сақлаб қолиш борасида барча саъй-ҳаракатлар амалга оширилмоқда.
Соғлиқни сақлаш вазирлиги томонидан ушбу касаллик тарқалишининг олдини олиш ва ўчоқларини тўлиқ бартараф этиш мақсадида қўшимча равишда 100000 доза қизамиқ ваксинаси олиниб, эмлаш учун жойларга етказилди. Шунингдек, қизамиқ касаллигини ўз вақтида аниқлаш, тарқалиб кетишининг олдини олиш ва даволаш ҳамда болаларни ваксина профилактикаси билан қамраб олиш мақсадида эпидемиологик назорат кучайтирилди.
Изоҳ (0)